សហភាពអឺរ៉ុប (EU) នៅថ្ងៃពុធ (ទី១៥ ខែឧសភា) នេះ បានជំរុញឲ្យអ៊ីស្រាអែលបញ្ឈប់ «ជាបន្ទាន់» នូវប្រតិបត្តិការយោធារបស់ខ្លួន នៅក្នុងទីក្រុង Rafah របស់តំបន់ហ្កាហ្សា ដោយព្រមានថា ការមិនបានធ្វើដូចនោះ នឹងនាំឲ្យខូចទំនាក់ទំនងជាមួយប្លុក។

សេចក្តីថ្លែងការណ៍តាងនាមឲ្យ EU ដែលត្រូវបានចេញដោយប្រធានគោលនយោបាយការបរទេសរបស់ប្លុក គឺលោក Josep Borrell បានឲ្យដឹងថា៖ «ប្រសិនបើអ៊ីស្រាអែលបន្តប្រតិបត្តិការយោធារបស់ខ្លួន នៅទីក្រុង Rafah នោះ វានឹងធ្វើឲ្យមានភាពតានតឹងយ៉ាងខ្លាំងក្លា ក្នុងទំនាក់ទំនង រវាង EU ជាមួយអ៊ីស្រាអែល»។

អមដោយការព្រមានថា ប្រតិបត្តិការនោះរំខានដល់ការផ្ដល់ជំនួយមនុស្សធម៌បន្ថែមទៀត នៅក្នុងតំបន់ហ្កាហ្សា និងកំពុងនាំឲ្យមានការផ្លាស់ទីលំនៅក្នុងតំបន់កាន់តែច្រើន ការប្រឈមនឹងគ្រោះទុរ្ភិក្ស និងការឈឺចាប់របស់មនុស្សទាំងឡាយនោះ សេចក្តីថ្លែងការណ៍បានសង្កត់ធ្ងន់ថា៖ «សហភាពអឺរ៉ុបជំរុញឲ្យអ៊ីស្រាអែលបញ្ឈប់ជាបន្ទាន់នូវប្រតិបត្តិការយោធារបស់ខ្លួន នៅទីក្រុង Rafah»។

គួរបញ្ជាក់ថា EU ដែលជាម្ចាស់ជំនួយដ៏សំខាន់មួយ សម្រាប់ដែនដីដីប៉ាឡេស្ទីន និងជាដៃគូពាណិជ្ជកម្មដ៏ធំបំផុតមួយរបស់អ៊ីស្រាអែល បាននិយាយថា មនុស្សជាង ១លាននាក់ ទាំងនៅក្នុង និងជុំវិញទីក្រុង Rafah ត្រូវបានអ៊ីស្រាអែលបញ្ជាឲ្យភៀសខ្លួនចេញពីតំបន់នេះទៅកាន់តំបន់ផ្សេងទៀត ដែលអង្គការសហប្រជាជាតិនិយាយថា មិនអាចចាត់ទុកថា មានសុវត្ថិភាពនោះឡើយ។

ប្លុកនេះបានលើកឡើងថា៖ «ទោះបីជា EU ទទួលស្គាល់សិទ្ធិការពារខ្លួនរបស់អ៊ីស្រាអែលក៏ដោយ ក៏អ៊ីស្រាអែលត្រូវតែធ្វើបែបនោះ ឲ្យស្របតាមច្បាប់មនុស្សធម៌អន្តរជាតិ និងផ្តល់សុវត្ថិភាពដល់ជនស៊ីវិល»៕