បណ្ដាអ្នកជំនាញបានព្រមានថា រដ្ឋធានីរបស់រដ្ឋនៅចុងភាគខាងត្បូងរបស់ប្រទេសប្រេស៊ីល អាចនឹងទទួលរងនូវទឹកជំនន់ធ្ងន់ធ្ងរ ក្នុងរយៈពេលជាច្រើនសប្តាហ៍ខាងមុខទៀត ដោយបានបង្កើនការលំបាក់ដល់មនុស្សកន្លះលាននាក់ដែលត្រូវបង្ខំចិត្តបោះបង់ចោលលំនៅឋានដោយសារទឹកជន់លិច។

សេវាអាកាសធាតុជាតិ INMET បានរាយការណ៍ថា ផ្នែកជាច្រើននៃរដ្ឋ Rio Grande do Sul បានជួបប្រទះនឹងកម្រិតទឹកភ្លៀងច្រើនជាង ៦៣០មីលីម៉ែត្រ មកទល់ពេលនេះក្នុងខែនេះ ពោលគឺច្រើនជាងកម្រិតទឹកភ្លៀងជាមធ្យមនៅទីក្រុងឡុងដ្រ៍របស់ប្រទេសអង់គ្លេស រយៈពេល ១ឆ្នាំ។

កម្រិតទឹករបស់បឹង Guaiba ដែលបានហូរបំបាក់ច្រាំងទន្លេ រហូតបង្កជាទឹកជំនន់នៅរដ្ឋ Porto Alegre បានឡើងខ្ពស់ម្តងទៀតក្នុងសប្តាហ៍នេះ ដល់កម្ពស់ ៥,២២ម៉ែត្រ ដោយឡើងលើសយ៉ាងច្រើនពីកម្រិតទឹកជំនន់ ៣,០ម៉ែត្រ និងឡើងជិតដល់កំណត់ត្រាកាលពីសប្តាហ៍មុន ដែលមានកម្ពស់ ៥,៣៣ម៉ែត្រ។

អ្នកឧតុនិយម និងវិស្វករនៅសាកលវិទ្យាល័យ Federal University of Rio Grande do Sul (UFRGS) បាននិយាយថា កម្រិតទឹកអាចថេរ ឬបន្តឡើងខ្ពស់ ប្រសិនបើមានភ្លៀងម្តងទៀត។ ពួកគេបានប្រាប់ថា វាអាចចំណាយពេលយ៉ាងហោចណាស់ ១ខែ ទម្រាំទឹកស្រកដល់កម្រិតក្រោមទឹកជំនន់ ដោយផ្អែកលើការប្រៀបធៀបកាលពីពេលមុន។

គួរបញ្ជាក់ថា ទឹកជំនន់បានបំផ្លិចបំផ្លាញទីក្រុងរាប់សិប រាប់តាំងក្នុងទីក្រុង Porto Alegre ជាកន្លែងដែលទីប្រជុំជននៅតែត្រូវលិចលង់ក្រោមទឹកជំនន់ ដោយបានសម្លាប់មនុស្សយ៉ាងហោចណាស់ ១៤៨នាក់ និងបណ្ដាលឲ្យ ២៤នាក់ នៅតែបាត់ខ្លួន។ មន្ត្រីរដ្ឋបាននិយាយថា លំនៅឋានជាង ២៦៧.០០០ខ្នង នៅតែគ្មានអគ្គិសនីប្រើប្រាស់ ហើយមនុស្ស ១៥៩.០០០នាក់ គ្មានលទ្ធភាពប្រើប្រាស់ទឹកបាន៕