ប្រមុខការទូតរបស់សហភាពអឺរ៉ុប បាននិយាយថា សហរដ្ឋអាមេរិក កំពុងបង្ហាញ «ភាពអស់កម្លាំង» នៅក្នុងការទូត នៅមជ្ឈិមបូព៌ារបស់ខ្លួន ហើយបានអំពាវនាវឲ្យមានកិច្ចខិតខំប្រឹងប្រែងរបស់សហភាពអឺរ៉ុបកាន់តែខ្លាំងចំពោះរដ្ឋប៉ាឡេស្ទីន។

ក្នុងដំណើរទស្សនកិច្ចទៅកាន់រដ្ឋកាលីហ្វ័រនីញ៉ា ប្រធានគោលនយោបាយការបរទេសរបស់ប្លុកនេះ លោក ចូសិប បូរ៉ែល (Josep Borrell) ជាថ្មីម្តងទៀត បានរិះគន់យ៉ាងខ្លាំងចំពោះយុទ្ធនាការសង្រ្គាមរបស់អ៊ីស្រាអែល ដោយនិយាយថា ប្រជាជនហ្កាហ្សា កំពុងស្លាប់ និងស្រេកឃ្លាន និងរងទុក្ខក្នុងសមាមាត្រដែលមិនអាចនឹកស្មានដល់» ហើយថាវា ជា «គ្រោះមហន្តរាយដែលបង្កើតឡើងដោយមនុស្ស»។

លោក បូរ៉ែល បាននិយាយនៅក្នុងសុន្ទរកថាកាលពីថ្ងៃចន្ទនៅឯសាកលវិទ្យាល័យ Stanford ដែលត្រូវបានចេញផ្សាយជាសាធារណៈ កាលពីថ្ងៃអង្គារថា៖«ខ្ញុំឃើញភាពអស់កម្លាំងជាក់លាក់មួយពីភាគីសហរដ្ឋអាមេរិក ដើម្បីបន្តចូលរួមក្នុងការស្វែងរកដំណោះស្រាយមួយ»។

លោកបាននិយាយជាភាសាអង់គ្លេសថា៖«យើងកំពុងព្យាយាមជំរុញជាមួយប្រជាជនអារ៉ាប់ ដើម្បីកសាងរួមគ្នា អារ៉ាប់ និងអឺរ៉ុប ដើម្បីធ្វើឲ្យដំណោះស្រាយរដ្ឋពីរនេះ ក្លាយជាការពិត»។

រដ្ឋមន្ត្រីការបរទេសអាមេរិក លោក អង់តូនី ប៊ីងខិន (Antony Blinke) បានធ្វើដំណើរចំនួន ៧លើកទៅកាន់មជ្ឈិមបូព៌ា ចាប់តាំងពីការវាយប្រហារ ដែលមិនធ្លាប់មានពីមុនមក កាលពីថ្ងៃទី៧ ខែតុលា ទៅលើអ៊ីស្រាអែល ដោយក្រុមហាម៉ាស ដែលបានជំរុញឲ្យមានយុទ្ធនាការយោធាអ៊ីស្រាអែលឥតឈប់ឈរ នៅក្នុងតំបន់ហ្កាហ្សា ដែលគ្រប់គ្រងដោយក្រុមហាម៉ាស។