ក្រសួងការពារជាតិ បាននិយាយថា ឧទ្ធម្ភាគចក្រមួយគ្រឿងដែលប្រើប្រាស់ដោយកងទ័ពអាកាសអាហ្វហ្គានីស្ថាន បានធ្លាក់ ខណៈដែលវាបានព្យាយាមចុះចតជាបន្ទាន់ នៅអាហ្វហ្គានីស្ថានភាគកណ្តាលនៅថ្ងៃពុធនេះ ដោយបានបណ្តាលឲ្យមនុស្សម្នាក់ ស្លាប់ និង ១២នាក់ផ្សេងទៀត រងរបួស។

ក្រសួងការពារជាតិដែលគ្រប់គ្រងដោយក្រុមតាលីបង់របស់ប្រទេសអាហ្វហ្គានីស្ថាន បាននិយាយនៅក្នុងសេចក្តីថ្លែងការណ៍មួយថា ឧទ្ធម្ភាគចក្រMi17 បានជួបប្រទះ «បញ្ហាបច្ចេកទេស» នៅពេលដែលវាព្យាយាមស្រង់សាកសពមនុស្ស ដែលបានធ្លាក់ចូលទៅក្នុងទន្លេ ក្នុងខេត្ត Ghor ភាគកណ្តាល។

ក្រសួងបានបន្ថែមថា ឧទ្ធម្ភាគចក្រនេះ បានធ្លាក់ ខណៈដែលវា បានព្យាយាមចុះចតជាបន្ទាន់។

ក្រុមតាលីបង់ ដែលជាចលនាឥស្លាម បានចូលកាន់កាប់អាហ្វហ្គានីស្ថាន បន្ទាប់ពីការដកទ័ពបរទេស ដឹកនាំដោយសហរដ្ឋអាមេរិក ក្នុងឆ្នាំ ២០២១ ហើយបានទទួលមរតកនូវយន្តហោះជាច្រើនគ្រឿងពីកងកម្លាំងនៃរបបសាធារណរដ្ឋដែលវាបានផ្តួលរំលំនោះ។