ក្រសួងការបរទេសចិន នៅថ្ងៃពុធ (១៥ ឧសភា) បាននិយាយថា សហរដ្ឋអាមេរិក ចក្រភពអង់គ្លេស និងអូស្ត្រាលី គួរតែបញ្ឈប់ការលើកកម្ពស់កិច្ចសហប្រតិបត្តិការនាវាមុជទឹកនុយក្លេអ៊ែរ រហូតដល់មានការសន្និដ្ឋានច្បាស់លាស់ពីសហគមន៍អន្តរជាតិសិន។

ប្រទេសចិនបានលើកឡើងថា បេសកកម្មអចិន្ត្រៃយ៍របស់ចិន នៅទីក្រុងវីយែន បានរៀបចំសិក្ខាសាលា ស្តីពីកិច្ចសហប្រតិបត្តិការនាវាមុជទឹកនុយក្លេអ៊ែរអាមេរិក-អង់គ្លេស-អូស្ត្រាលី (AUKUS) នៅមជ្ឈមណ្ឌលទីក្រុងវីយែន ហើយបាននិយាយថា កិច្ចសហប្រតិបត្តិការនាវាមុជទឹកនុយក្លេអ៊ែរ រវាងប្រទេសទាំង3 ធ្វើឲ្យខូចដល់កិច្ចខិតខំប្រឹងប្រែង ដើម្បីរក្សាសន្តិភាព និងសន្តិសុខ ក្នុងតំបន់។

គួរបញ្ជាក់ថា AUKUS គឺជាកតិកាសញ្ញាសន្តិសុខត្រីភាគី រវាងប្រទេសអូស្ត្រាលី ចក្រភពអង់គ្លេស និងសហរដ្ឋអាមេរិក ដែលបានចុះហត្ថលេខា នៅឆ្នាំ២០២១។

នៅក្នុងសន្និសីទសារព័ត៌មានប្រចាំថ្ងៃ អ្នកនាំពាក្យក្រសួងការបរទេសចិន លោក Wang Wenbin បាននិយាយថា៖ «កិច្ចសហប្រតិបត្តិការនេះ នឹងបង្កើតឲ្យមានហានិភ័យដ៏ធំនៃការរីកសាយភាយនុយក្លេអ៊ែរ និងមានឥទ្ធិពលជាអវិជ្ជមានយ៉ាងខ្លាំងក្លាដល់ការដោះស្រាយបញ្ហានុយក្លេអ៊ែរ ក្នុងតំបន់ផ្សេងទៀត»៕