នាយករដ្ឋមន្ត្រីថៃ លោក Srettha Thavisin (សេដ្ឋា ថាវីស៊ីន) នៅថ្ងៃពុធ (ទី១៥ ខែឧសភា) នេះ បានបញ្ជាឲ្យមានការស៊ើបអង្កេតលើការស្លាប់របស់សកម្មជននយោបាយវ័យក្មេងម្នាក់ ដែលបានកើតឡើងបន្ទាប់ពីជនជាប់ចោទស្រីរូបនោះបានធ្វើកូដកម្មអត់អាហារពាក់កណ្ដាល អំឡុងពេលត្រូវបានឃុំខ្លួនមុនកាត់ក្ដី ពាក់ព័ន្ធនឹងបទចោទប្រកាន់នានា ដែលរួមមានទាំងការប្រមាថព្រះមហាក្សត្ររបស់ប្រទេសផងដែរ។

សូមបញ្ជាក់ថា មនុស្សរាប់រយនាក់ ក្នុងនោះរួមទាំងសកម្មជន និងតំណាងរាស្រ្តគណបក្សប្រឆាំងផងដែរ បានចូលរួមពិធីអុជភ្លើងទៀន កាលពីយប់ថ្ងៃទី១៤ ខែឧសភា ដើម្បីគោរពវិញ្ញាណក្ខន្ធរបស់នាង Netiporn «Bung» Sanesangkhom អាយុ ២៨ឆ្នាំ ដែលបានបាត់បង់ជីវិតនៅក្នុងមន្ទីរពេទ្យរបស់ពន្ធនាគារ ដោយគាំងបេះដូង។ អ្នកការទូតលោកខាងលិច និងក្រុមសិទ្ធិមនុស្ស បានកាន់ទុក្ខមរណភាពរបស់នាងនៅលើបណ្ដាញសង្គម។

លោក សេដ្ឋា បានប្រាប់អ្នកសារព័ត៌មានថា៖ «វាគឺជារឿងសោកសៅដែលមានការបាត់បង់ជីវិតនេះ ហើយខ្ញុំសូមចូលរួមរំលែកទុក្ខដល់ក្រុមគ្រួសារសពផង»។ លោកបានបន្ថែមថា៖ «ខ្ញុំបានណែនាំក្រសួងយុត្តិធម៌ឲ្យស៊ើបអង្កេតលម្អិតអំពីការស្លាប់របស់នាង»។

គួរបញ្ជាក់បន្ថែមថា មេធាវីថៃដើម្បីសិទ្ធិមនុស្ស ដែលជាក្រុមផ្ដល់ជំនួយផ្លូវច្បាប់ បាននិយាយថា នាង Netiporn ត្រូវបានចាប់ដាក់ពន្ធនាគារ កាលពីខែមករា ពីបទមិនគោរពតុលាការ ហើយការឃុំឃាំងលើរូបនាង ត្រូវបានធ្វើបន្តបន្ទាប់ពីការធានាឲ្យនៅក្រៅរបស់នាងត្រូវបានលុបចោលនៅក្នុងសំណុំរឿងប្រមាថព្រះមហាក្សត្រ។ រូបនាងបានទៅធ្វើកូដកម្មអត់អាហាររយៈពេល ១ខែ មុនពេលសុខភាពរបស់នាងមានសភាពកាន់តែយ៉ាប់យ៉ឺន។

នៅថ្ងៃទី១៥ ខែឧសភានេះ នាយកដ្ឋានកែប្រែបាននិយាយនៅក្នុងសន្និសីទសារព័ត៌មានថា នាងបានចាប់ផ្តើមញ៉ាំអាហារទន់ៗ កាលពីដើមខែមេសា ប៉ុន្តែបានបដិសេធមិនទទួលយកវីតាមីន និងសារធាតុរ៉ែ។ នាយកដ្ឋានបានបញ្ជាក់ថា នាងមិនមានស្ថានភាពធ្ងន់ធ្ងរនោះទេ មុនពេលស្លាប់ ដោយបន្ថែមថា ខ្លួនកំពុងរង់ចាំការធ្វើកោសល្យវិច័យផ្លូវការ ដើម្បីកំណត់ពីមូលហេតុនៃការស្លាប់នេះ៕