រដ្ឋមន្ត្រីការបរទេសអៀរឡង់ លោក Micheal Martin នៅថ្ងៃពុធ (ទី១៥ ខែឧសភា) នេះ បាននិយាយថា ប្រទេសរបស់លោក ច្បាស់ណាស់ នឹងទទួលស្គាល់ភាពជារដ្ឋរបស់ប៉ាឡេស្ទីន នៅចុងខែឧសភានេះ។

លោក Martin ដែលជាឧបនាយករដ្ឋមន្ត្រីអៀរឡង់ដែរនោះ បានប្រាប់ស្ថានីយវិទ្យុ Newstalk ថា៖ «យើងនឹងទទួលស្គាល់រដ្ឋប៉ាឡេស្ទីន នៅមុនដំណាច់ខែនេះ»។

សូមបញ្ជាក់ថា កាលពីខែមីនា មេដឹកនាំនៃប្រទេសអេស្ប៉ាញ អៀរឡង់ ស្លូវេនី និងម៉ាល់តា បាននិយាយនៅក្នុងសេចក្តីថ្លែងការណ៍រួមថា ពួកគេត្រៀមខ្លួនរួចជាស្រេច ដើម្បីទទួលស្គាល់ភាពជារដ្ឋរបស់ប៉ាឡេស្ទីន។

អៀរឡង់បានប្រាប់ជាយូរមកហើយថា ខ្លួនមិនមានការជំទាស់ជាគោលការណ៍ ក្នុងការទទួលស្គាល់រដ្ឋប៉ាឡេស្ទីនជាផ្លូវការទេ ប្រសិនបើវាអាចជួយដល់ដំណើរការសន្តិភាព នៅតំបន់មជ្ឈិមបូព៌ា។ ប៉ុន្តែសង្គ្រាមរបស់អ៊ីស្រាអែលប្រឆាំងនឹងក្រុមសកម្មប្រយុទ្ធហាម៉ាស នៅតំបន់ហ្កាហ្សា បានផ្តល់នូវកម្លាំងជំរុញថ្មី។

កាលពីសប្តាហ៍មុន ប្រធានគោលនយោបាយការបរទេសរបស់សហភាពអឺរ៉ុប លោក Josep Borrell បាននិយាយថា ប្រទេសអេស្ប៉ាញ អៀរឡង់ និងស្លូវេនី គ្រោងនឹងទទួលស្គាល់រដ្ឋប៉ាឡេស្ទីនជានិមិត្តរូប នៅថ្ងៃទី២១ ខែឧសភា ដោយបណ្ដាប្រទេសផ្សេងទៀតអាចនឹងធ្វើតាម។ ប៉ុន្តែលោក Martin របស់អៀរឡង់ នៅថ្ងៃទី១៥ ខែឧសភានេះ បានចៀសវាងមិនលើកឡើងពីកាលបរិច្ឆេទឡើយ៕