នាយឧត្តមសេនីយ៍ វង្ស ពិសេន អគ្គមេបញ្ជាការកងយោធពលខេមរភូមិន្ទ បានលើកឡើងថា សមយុទ្ធ នាគមាស លើកទី៦រវាងកងទ័ពកម្ពុជា និងចិន នៅឆ្នាំ២០២៤នេះ បានក្លាយទៅជានិម្មិតរូបនៃកិច្ចសហប្រតិបត្តិការដ៏រឹងមាំមិនអាចបំបែកបានរវាងកម្ពុជា និងចិននោះឡើយ ហើយមួយវិញទៀតសមយុទ្ធនេះក៏បានឆ្លុះបញ្ចាំងអំពីឆន្ទៈនយោបាយ មនោសញ្ចេតនា ក្នុងនាមជាបងប្អូនដែកថែប មិត្តអមតៈផងដែរ។
ថ្លែងក្នុងពិធីបើកសមយុទ្ធ«នាគមាសឆ្នាំ២០២៤» រវាងកងយោធពលខេមរភូមិន្ទ ជាមួយកងទ័ព រំដោះប្រជាជនចិន នាថ្ងៃទី១៦ ខែឧសភា ឆ្នាំ២០២៤នេះ នៅមជ្ឈមណ្ឌលហ្វឹកហ្វឺនកងរាជអាវុធហត្ថ ភ្នំជុំ សែនរីករាយ ស្ថិតនៅខេត្តកំពង់ឆ្នាំងនោះ នាយឧត្តមសេនីយ៍ វង្ស ពិសេន បានបញ្ជាក់ថា គោល បំណងនៃសមយុទ្ធនាគមាស-២០២៤ គឺដើម្បីអភិវឌ្ឍឲ្យកាន់តែស៊ីជម្រៅនូវទំនាក់ទំនងជាដៃគូកិច្ចសហប្រតិបត្តិការយុទ្ធសាស្រ្តគ្រប់ជ្រុងជ្រោយកម្ពុជា-ចិន ពង្រឹងទំនុកចិត្តនយោបាយទៅវិញទៅមក បម្រើឲ្យ ការកសាងសហគមន៍វាសនារួមកម្ពុជា-ចិនក្នុងយុគសម័យថ្មី ជំរុញកិច្ចសហប្រតិបត្តិការនិងការផ្លាស់ប្តូរ បទពិសោធន៍រវាងកងទ័ពទាំងពីរ ពង្រឹងទស្សនៈសន្តិសុខដែលមានលក្ខណៈរួមគ្នា កិច្ចសហការនិងនិរន្ទ ភាព រួមគ្នាថែរក្សាស្ថានភាព សន្តិភាពតំបន់ដ៏ល្អប្រសើរនាពេលបច្ចុប្បន្ន លើកកម្ពស់សមត្ថភាព និងលទ្ធ ភាពប្រយុទ្ធជាក់ស្តែង នៃកងទ័ពទាំងពីរ(កម្ពុជា-ចិន) ក្នុងការប្រយុទ្ធប្រឆាំងនឹងភេរវកម្មនិយម។
នាយឧត្តមសេនីយ៍ វង្ស ពិសេន បានបញ្ជាក់ថា«សមយុទ្ធនាគមាសបានក្លាយជានិម្មិតរូបនៃកិច្ចសហប្រតិបត្តិការដ៏រឹងមាំមិនអាចបំបែកបានរវាងប្រទេស និងកងទ័ពកម្ពុជា និងចិន ហើយសមយុទ្ធនេះ ពិតជាផ្តល់សារសំខាន់ក្នុងការលើកកម្ពស់សមត្ថភាព និងការយល់ដឹងបន្ថែមទៀតដល់កងទ័ពទាំងពីរ ដូច ជាការបង្ហាញអំពីសមត្ថភាព ការផ្លាស់ប្តូរបទពិសោធន៍គ្នាទៅវិញទៅមក បង្កើនការយល់ដឹងពីការបញ្ជា ចម្រុះ និងនីតិវិធីប្រតិបត្តិការចម្រុះ យុទ្ធោបករណ៍ បច្ចេកទេស និងជំនាញថ្មីៗ។ សមយុទ្ធនេះ ក៏បានឲ្យ កងទ័ពយើងពង្រឹងបាននូវទំនាក់ទំនងល្អ បង្កើនចំណងសាមគ្គីភាព ចេះសម្របសម្រួល អាចរស់នៅ និង ធ្វើការងាររួមគ្នាជាមួយជាតិសាសន៍ដទៃក្នុងពេលធ្វើប្រតិបត្តិការរួម ដើម្បីឆ្លើយតបយ៉ាងមានប្រសិទ្ធភាព និងទាន់ពេលវេលាក្នុងប្រតិបត្តិការទាំងថ្នាក់ជាតិ និងអន្តរជាតិ ក្នុងគោលបំណងចូលរួមទប់ស្កាត់ និង ដោះស្រាយបញ្ហាប្រឈមនានា ដែលអាចកើតមានឡើងជាយថាហេតុ»។
នៅចំពោះមុខវត្តមាន នៃកងទ័ពចិន និងបណ្តាអនុពន្ធ និងសេនានុពន្ធយោធានៃប្រទេសជាមិត្តជាច្រើនទៀតនាយឧត្តមសេនីយ៍ វង្ស ពិសេន ក៏បានបញ្ជាក់ផងដែរថា ដើម្បីឆ្លើយតបនឹងសន្តានចិត្តដ៏ល្អរបស់មិត្តចិន កម្ពុជាបានប្រកាន់ខ្ជាប់ជានិច្ចនូវ«នយោបាយចិនតែមួយ» ប្រឆាំងដាច់ខាតការជ្រៀតជ្រែក កិច្ចការផ្ទៃក្នុង ឬចលនាបំបែកទឹកដីណាមួយដែលប៉ះពាល់ដល់អធិបតេយ្យភាព បូរណភាពទឹកដីនៃសាធារណរដ្ឋប្រជាមានិតចិនផងដែរ។
យ៉ាងណាក៏ដោយនៅក្នុងពិធីបើកសមយុទ្ធនាគមាសឆ្នាំ២០២៤នេះដែរ នាយឧត្តមសេនីយ៍ វង្ស ពិសេន អគ្គមេបញ្ជាការកងយោធពលខេមរភូមិន្ទ ក៏បានសង្ឈឹមយ៉ាងមុតមាំផងដែរថា សមយុទ្ធនាគមាស លើកទី៦នេះ នឹងនាំមកនូវផលប្រយោជន៍យ៉ាងធំធេង ដល់កងយោធពលខេមរភូមិន្ទ ទាំងបច្ចេកវិជ្ជា បទពិសោធន៍ និងចំណេះដឹងជំនាញថ្មីៗ ដើម្បីអភិវឌ្ឍសមត្ថភាពរបស់ខ្លួនឲ្យកាន់តែមានសក្តានុពលខ្លាំងក្លា បន្ថែមទៀតផងដែរ។
សមយុទ្ធយោធារវាងកម្ពុជា និងចិនដែលមានឈ្មោះថា«នាគមាស»ឆ្នាំ២០២៤នេះ នឹងធ្វើឡើងក្រោមវិធានបទ «ប្រតិបត្តិការប្រឆាំងអំពើភេរវកម្មរួម និងការសង្រ្គោះមនុស្សធម៌» រយៈពេល១៥ថ្ងៃគឺចាប់ពីថ្ងៃទី១៦ ដល់ថ្ងៃទី៣០ ខែឧសភា ឆ្នាំ២០២៤ នៅភ្នំជុំសែនរីករាយ ខេត្តកំពង់ឆ្នាំង និងខេត្តព្រះសីហនុ ខណៈសមយុទ្ធដែលមានបាញ់គ្រាប់ពិតផងដែរនោះ គឺធ្វើឡើងតាមរយៈកិច្ចសហប្រតិបត្តិការ ប្រចាំឆ្នាំទ្វេភា គីរវាងកម្ពុជា និងចិន ក្នុងគោលបំណងផ្លាស់ប្តូរបទពិសោធន៍គ្នាទៅវិញទៅមក នៃការទប់ស្កាត់ និងបង្រ្កាបអំពើភេរវកម្ម ការប្រឆាំងដ្រូនស៊ើបការរបស់សត្រូវ និងក៏ដើម្បីបង្កើនសមត្ថភាពកងទ័ពនៃប្រទេសទាំងពីរពាន់ឲ្យកាន់តែល្អប្រសើរបន្ថែមទៀត ក្នុងកិច្ចការពារជាតិ ការពារសន្តិសុខក្នុងតំបន់ និងពិភពលោក ពុំមែនធ្វើឡើងដើម្បីជាការគំរាមកំហែង ឬធ្វើឲ្យប៉ះពាល់ដល់អ្នកណាឬប្រទេសណានោះឡើយ។
សូមបញ្ជាក់ថា សមយុទ្ធយោធាទេភាគីរវាងកម្ពុជា និងចិនដែលមានឈ្មោះថា«នាគមាស»នេះគឺ បានប្រព្រឹត្តទៅចំនួន៥លើកមកហើយ ខណៈលើកទី៦នេះ មានលក្ខណៈទ្រង់ទ្រាយធំជាងមុនៗទៅទៀត ដោយ ឆ្នាំនេះ គឺមានចំនួនកងទ័ពភាគីទាំងរហូតដល់ជាងពីរពាន់នាក់ចូលរួម ដោយក្នុងនោះកងទ័ពចិនចំនួនជាង៧រយនាក់ រួមទាំងសព្វាវុធទំនើបៗ ឧត្ថម្ភាចក្រ និងថែមទាំងមាននាវាចម្បាំងទាំងខ្នាតធំ និងតូចចំនួន១៤គ្រឿងផងដែរ៕ អត្ថបទបាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
