​កូរ៉េខាងត្បូង​៖ សមាជិកសភា​កូរ៉េខាងត្បូង​បាន​និយាយ​កាលពី​ថ្ងៃ​អង្គារ​ ​ទី​៣ ខែ​សីហា​ថា ​កូរ៉េខាង​ជើង​ចង់​ឲ្យ​មានការ​លើកលែង​ទណ្ឌកម្ម​អន្តរជាតិ​ ដែល​ហាមឃាត់​ការនាំចេញ​លោហធាតុ​របស់​ខ្លួន ​និង​ការ​នាំចូល​ប្រេងឥន្ធនៈ​ចម្រាញ់ ​និង​តម្រូវការ​ចាំបាច់​ផ្សេងទៀត​ដើម្បី​ចាប់ផ្ដើម​ឡើងវិញ​នូវ​កិច្ចចរចា​ ស្ដីពី​ការរំសាយ​អាវុធ​នុយក្លេអ៊ែរ​ឡើងវិញ​ជាមួយ​សហរដ្ឋអាមេរិក​។​

​សមាជិកសភា​រូប​នេះ​បាន​និយាយ បន្ទាប់ពី​ត្រូវ​បាន​រាយការណ៍​ដោយ​ទីភ្នាក់ងារ​ចារកម្ម​សំខាន់​របស់​កូរ៉េខាងត្បូង​ថា កូរ៉េខាងជើង​បាន​ទាមទា​រ​ឱ្យ​មាន​ការ​បន្ធូរបន្ថយ​ទណ្ឌកម្ម ​លើ​ការ​នាំចូល​ទំនិញ​ប្រណីត​របស់​ខ្លួន​ដើម្បី​អាច​នាំចូល​ស្រា​ល្អៗ និង​សម្លៀកបំពាក់​។​ ការ​ផ្ដល់​របា​ការណ៍​នេះ​កើតឡើង​មួយ​សប្ដាហ៍ បន្ទាប់ពី​កូរ៉េ​ទាំង​២​ បាន​ភ្ជាប់​បណ្ដាញ​ទំនាក់ទំនង​ខ្សែ​ទូរស័ព្ទ​ទាន់​ហេតុការណ៍​ ដែល​កូរ៉េខាងជើង​បាន​ផ្អាក​កាល​ពី​មួយ​ឆ្នាំមុន​។​ សារព័ត៌មាន​រដ្ឋ​កូរ៉េខាងជើង​ពុំបាន​និយាយ​អ្វី​ទេ ​ទាក់ទង​នឹង​ការ​ស្នើ​ថ្មី​ណាមួយ​កាលពី​ថ្ងៃ​អង្គារ ​អំពី​ការលើកលែង​ទណ្ឌកម្មដើម្បី​ចាប់ផ្ដើម​ការចរចា​ឡើងវិញ​។​

​សមាជិកសភា​កូរ៉េខាងត្បូង​បាន​និយាយ​ថា ទាំង​មេដឹកនាំ​កូរ៉េខាងជើង​ លោក Kim Jong Un ទាំង​ប្រធានាធិបតី​កូរ៉េខាងត្បូង ​លោក Moon Jae-in បាន​សម្ដែង​ឆន្ទៈ​ក្នុង​ការ​កសាង​ទំនុក​ចិត្ត​ឡើងវិញ ​និង​ពង្រឹង​ទំនាក់ទំនង​ចាប់​តាំង​ពី​ខែ​មេសា​ ហើយ​លោក Kim បាន​ស្នើសុំ​ឱ្យ​មាន​ការ​តភ្ជាប់​បណ្តាញ​ទូរស័ព្ទ​បន្ទាន់​ឡើងវិញ​។​ ក្រុម​តំណាងរាស្ត្រ​ទាំងនោះ​ក៏បាន​និយាយ​ផង​ដែរ​ថា ​កូរ៉េខាងជើង​ត្រូវការ​អង្ករ​ប្រហែល ១​លាន​តោន​ជា​ចាំបាច់ ខណៈ​សេដ្ឋកិច្ច​របស់​ប្រទេស​នេះ​ត្រូវ​បាន​រង​ផល​ប៉ះពាល់​ដោយ​ជំងឺ​រាតត្បាត​សកល COVID-19 និង​អាកាសធាតុ​អាប់អួ​កាលពី​ឆ្នាំមុន​៕

អត្ថបទ៖ សុខមាន