ប្រធានាធិបតីស្វីស លោកស្រី វីអូឡា អែមហឺត (Viola Amherd) បាននិយាយកាលពីថ្ងៃពុធ (១៥ ឧសភា) ថា កិច្ចប្រជុំកំពូលដែលប្រទេសស្វីស សង្ឃឹមថានឹងត្រួសត្រាយផ្លូវសម្រាប់ដំណើរការសន្តិភាពនៅក្នុងប្រទេសអ៊ុយក្រែន បានទាក់ទាញគណៈប្រតិភូមកពីជាង ៥០ ប្រទេស។

លោកស្រី អែមហឺត បាននិយាយនៅក្នុងសន្និសីទសារព័ត៌មានមួយជាមួយអធិការបតីអាល្លឺម៉ង់ លោក អូឡាហ្វ សូល (Olaf Scholz) បន្ទាប់ពីមេដឹកនាំទាំងពីរបានជួបគ្នានៅទីក្រុងប៊ែរឡាំងថា រដ្ឋាភិបាលស្វីសអព្យាក្រឹតកំពុងស្វះស្វែងរកអ្នកចូលរួមដែលមានមូលដ្ឋានទូលំទូលាយពីផ្នែកផ្សេងៗនៃពិភពលោក ហើយការអញ្ជើញចំនួន ១៦០ លិខិតត្រូវបានផ្ញើ។ លោកស្រីបន្ថែមថា ប្រទេសស្វីសចង់បញ្ចុះបញ្ចូលប្រទេសជាច្រើនទៀតពីអ្វីដែលហៅថាបណ្ដាប្រទេសសកលខាងត្បូង ក៏ដូចជាប្រទេសចិន ឱ្យចុះឈ្មោះចូលរួម។

បណ្ដាប្រទេសនៅអាមេរិកខាងត្បូង អាហ្រ្វិក និងមជ្ឈិមបូព៌ា ស្ថិតក្នុងចំណោមប្រទេសដែលបញ្ជាក់ថាពួកគេនឹងមកចូលរួម នេះបើយោងតាមលោកស្រី អែមហឺត ដែលកាលពីខែមករា បានយល់ព្រមធ្វើជាម្ចាស់ផ្ទះនៃកិច្ចប្រជុំនេះតាមសំណើរបស់ប្រធានាធិបតីអ៊ុយក្រែន លោក វ្ល៉ូឌីមី ហ៊្សេឡិនស្គី (Volodymyr Zelenskiy)។

រុស្ស៊ី ដែលបានបើកសង្គ្រាមលើអ៊ុយក្រែន ជាងពីរឆ្នាំមុន មិនត្រូវបានអញ្ជើញទេ។ ក្រុមអ្នកការទូត និងអ្នកជំនាញខាងគោលនយោបាយការបរទេសបាននិយាយថា កិច្ចពិភាក្សាដែលនឹងត្រូវធ្វើឡើងនៅជិតទីក្រុង លូសើន (Lucerne) របស់ស្វីស ទំនងជាផ្តោតលើវិធីកាត់បន្ថយហានិភ័យដែលបណ្តាលមកពីការវាយលុករបស់ទីក្រុងមូស្គូ៕