​បាល់ទាត់៖ ក្លិប​​អ៊ីតាលី Inter Milan បាន​បដិសេធ​សំណើ ៨៥លាន​ផោន​ពី Chelsea ដែល​ចង់បាន​ខ្សែប្រយុទ្ធ​ប៊ែ​ល​ហ្ស៊ិ​ក Romelu Lukaku ត្រលប់​ទៅវិញ​។ ​កីឡាករ​វ័យ ២៨ឆ្នាំ​គឺជា​គោល​ដៅ​របស់ Chelsea ដែល​កំពុង​ស្វែងរក​ខ្សែប្រយុទ្ធ​ជួរមុខ​ម្នាក់​ បន្ទាប់ពី​ការ​ចង់​បាន​ខ្សែប្រយុទ្ធ Dortmund, Erling Haaland មិន​អាច​ទៅ​រួច​។​

​​ស្រប​ពេល​ដែល Inter Milan នៅ​ពេល​នេះ​កំពុង​មាន​វិបត្តិ​ហិរញ្ញវត្ថុ​ផង​ដែរ​នោះ Inter Milan មិន​សំរេច​ចិត្ត​ភ្លាមៗ​ពី​ការ​លក់​ចេញ Lukaku ក្នុង​តម្លៃ​បែបនេះ​ឡើយ​។ ​បើតាម​ការចុះផ្សាយ Chelsea បានដាក់​សំណើ ៨៥​លាន​ផោន​នេះ​បូក​បន្ថែម​ជាមួយ​កីឡាករ​អេ​ស្ប៉ា​ញ Marcos Alonso ម្នាក់ទៀត​។ ​Romelu Lukaku ធ្លាប់ជា​អតីត​កីឡាករ​របស់ Chelsea ចន្លោះ​ឆ្នាំ​២០១១ ដល់ ២០១៤ មុន​ពេល​ផ្ទេរ​ទៅកាន់ Everton ក្រោយ​ចំណាយ​ពេល​ ១រដូវ​កាល​ក្នុង​លក្ខខណ្ឌ​ខ្ចី​នៅ Goodison Park​។​ ​កាលពី​ឆ្នាំ២០១៧ Lukaku ស្ទើរតែ​ផ្ទេរ​មកកាន់ Chelsea វិញ​ទៅហើយ​តែ​ផ្ទុយទៅវិញ​គេ​បានជ្រើសរើស​យក Manchester United ក្នុងតម្លៃ ៧៥លាន​ផោន​ក្រោម​ការដឹកនាំ​របស់ Jose Mourinho នៅពេលនោះ​។​

​​Lukaku ស៊ុត​បញ្ចូល​ទី​បាន ៤២គ្រាប់​ក្នុងការ​បង្ហាញខ្លួន ៩៦ប្រកួត​ឱ្យ Manchester United តែ​ក៏បាន​ចាក​ចេញទៅ Inter Milan កាលពី​ឆ្នាំ២០១៩ ក្នុងតម្លៃ​កំណត់ត្រា​ក្លិប ៧៤លាន​ផោន​ជាមួយនឹង​កិច្ចសន្យា ៥ឆ្នាំ​។ ​Lukaku គឺជា​សមាជិក​សំខាន់​របស់ Inter Milan ដែល​ឈ្នះ​ជើង​ឯក Serie A រដូវ​កាល​មុន​ក្រោយ​រកបាន ២៤គ្រាប់ និង​បញ្ជូន ១១បាល់​៕

​អត្ថបទ​៖​នាង សុភា​វុ​ធ