មន្ត្រីជាន់ខ្ពស់នៃកម្មវិធីស្បៀងអាហារពិភពលោករបស់អង្គការសហប្រជាជាតិ (WFP) លោក ខាល ស្កាវ (Carl Skau) កាលពីថ្ងៃពុធ (១៥ ឧសភា) បានព្រមានថា ឱកាសដើម្បីជួយសង្គ្រោះជីវិតមនុស្សនៅក្នុងប្រទេសស៊ូដង់កំពុងជិតអស់ ខណៈដែលទុរ្ភិក្សកំពុងកើតមាននៅក្នុងបណ្ដាតំបន់ដែលហែកហួរដោយសង្រ្គាមរបស់ប្រទេសនេះ។

យ៉ាងហោចណាស់មនុស្ស ៥ លាននាក់នៅក្នុងប្រទេសស៊ូដង់ កំពុងធ្លាក់ក្នុងភាពអត់ឃ្លាន ដែលភាគច្រើននៃអ្នកទាំងនោះនៅក្នុងតំបន់ដែលរងផលប៉ះពាល់ដោយជម្លោះ ដែលបានផ្ទុះឡើងកាលពីខែមេសា ឆ្នាំមុន រួមទាំងតំបន់ ដាហ្វឺ (Darfur) និងតំបន់ ខូដូហ្វាន (Kordofan) និងរដ្ឋធានី ខាទុម (Khartoum) នេះបើយោងតាមកម្មវិធីស្បៀងអាហារ WFP ។

ទីភ្នាក់ងារនេះបានព្រមានម្តងហើយម្តងទៀតថា ស៊ូដង់អាចប្រឈមមុខនឹងវិបត្តិអត់ឃ្លានដ៏អាក្រក់បំផុតរបស់ពិភពលោក ខណៈដែលជម្លោះបានឈានចូលដល់ឆ្នាំទីពីររបស់ខ្លួន។ យោងតាមអង្គការសហប្រជាជាតិ ពាក់កណ្តាលនៃចំនួនប្រជាជនស៊ូដង់ ឬប្រហែល ២៥ លាននាក់ ត្រូវការជំនួយមនុស្សធម៌ និងការការពារ ខណៈដែលជិត ១៨ លាននាក់ប្រឈមមុខនឹងអសន្តិសុខស្បៀងធ្ងន់ធ្ងរ។

ស៊ូដង់បាននិងកំពុងឃើញការប៉ះទង្គិចគ្នាយ៉ាងបង្ហូរឈាមរវាងកងកម្លាំងប្រដាប់អាវុធស៊ូដង់ និងកងកម្លាំងគាំទ្ររហ័សយោធាប៉ារ៉ា ចាប់តាំងពីថ្ងៃទី១៥ ខែមេសា ឆ្នាំ២០២៣ ដែលបានសម្លាប់មនុស្ស ១៥.៥៥០ នាក់ និងជម្លៀសមនុស្ស ៨,៧ លាននាក់ទៀតមកទល់ពេលនេះ នេះបើយោងតាមការប៉ាន់ស្មានថ្មីៗរបស់ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌៕