​កូរ៉េខាងជើង៖ ទីភ្នាក់ងារ​ចារកម្ម​កូរ៉េខាងត្បូង​បាន​និយាយ​កាលពី​ថ្ងៃ​អង្គា​រថា ​ប្រទេស​កូរ៉េខាងជើង​កំពុង​បញ្ចេញ​អង្ករ​បម្រុង​ទុក​ សម្រាប់​សង្គ្រោះ​បន្ទាន់​រប​ស់​យោធា ស្រប​ពេល​កង្វះ​ស្បៀងអាហារ​របស់​ខ្លួន​កាន់តែ​ធ្ងន់ធ្ងរ​ទៅដោយសារ​រលក​កម្ដៅ និង​គ្រោះ​រាំងស្ងួត​បង្ក​ឲ្យ​មានការ​កាត់បន្ថយ​ការ​ផ្គត់ផ្គង់​របស់​ប្រទេស​នេះ​។​

​បញ្ហា​ស្បៀងអាហារ​របស់​កូរ៉េខាងជើង​បាន​កើត​មាន​ឡើង​ ខណៈ​ដែល​សេដ្ឋកិច្ច​ទន់ខ្សោយ​របស់​ខ្លួន​នៅតែ​បន្ត​រង​ផល​ប៉ះពាល់​ ដោយសារ​ការ​រីក​រាលដាល​នៃ​វីរុស​រាតត្បាត​សកល COVID-19។ ខណៈ​ភាព​អត់​ឃ្លាន​ និង​ភាព​វឹកវរ​ក្នុង​សង្គម​មិន​ត្រូវ​បាន​គេ​រាយការណ៍ ដែល​ក្រុម​អ្នកសង្កេតការណ៍​រំពឹង​ថា ​ស្ថានការណ៍​ស្បៀងអាហារ​របស់​កូរ៉េខាងជើង​កាន់តែ​យ៉ាប់យ៉ឺន ​រហូតដល់​រដូវ​ប្រមូល​ផល​រដូវ​ស្លឹក​ឈើ​ជ្រុះ​។​ ​ទីភ្នាក់ងារ​ចារកម្ម​សេ​អ៊ូ​ល​បាន​ប្រាប់​កិច្ចប្រជុំ​គណៈកម្មាធិការ​សភា​បិទទ្វារ​ថា ​កូរ៉េខាងជើង​កំពុង​ផ្គត់ផ្គង់​អង្ករ​ដែល​ទុក​ សម្រាប់​ប្រើប្រាស់​ក្នុង​សម័យ​សង្គ្រាម​ដល់​ពលរដ្ឋ​ដែល​មាន​អាហារ​តិចតួច ពលករ​ផ្សេងទៀត​ និង​ទី​ភ្នាក់ងារ​រដ្ឋ​ជនបទ នេះ​បើ​យោង​តាម​លោក Ha Tae-keung សមាជិកសភា​កូរ៉េខាងត្បូង​ដែល​បាន​ចូលរួម​សម័យប្រជុំ​នោះ​។​

​តម្លៃ​អង្ករ​ដែល​ជា​ដំណាំ​សំខាន់​បំផុត​នៅ​កូរ៉េខាងជើង​ បាន​កើន​ឡើង​ទ្វេដង​ចាប់​តាំង​ពី​ដើម​ឆ្នាំនេះ​។ តម្លៃ​នេះ​បន្ត​ហក់​ង​រយៈពេល​ខ្លី​ក្នុង​ខែ​កក្កដា មុននឹង​កើន​ឡើង​ម្តង​ទៀត​។​ ​ក្នុង​អំឡុង​កិច្ចប្រជុំ​គណបក្ស​កាន់​អំណាច​ដ៏​សំខាន់​មួយ​កាលពី​ខែ​មិថុនា​ លោក Kim បាន​ជំរុញ​ឱ្យ​មន្ត្រី​រក​វិធី​ដើម្បី​ជំរុញ​ផលិតកម្ម​កសិកម្ម​ ដោយ​និយាយ​ថាស្ថានភាព​ស្បៀងអាហារ​របស់​ប្រទេស​ ''ឥឡូវនេះ​កាន់តែ​ដុនដាប​ហើយ''​។ កាល​ពី​ពេល​ថ្មីៗ​នេះ លោក​ថែមទាំង​ប្រៀបធៀប​ការ​លំបាក​ទាក់​ទង​នឹង​ជំងឺ​រាតត្បាត​សកល ដែល​កំពុង​បន្ត​នឹង​គ្រោះ​ទុរ្ភិក្ស​ឆ្នាំ​១៩៩០ ដែល​បាន​សម្លាប់​មនុស្ស​រាប់​សែន​នាក់​៕

អត្ថបទ៖ សុខមាន