ស្ថានភាពនានា ដូចជាជំងឺភ្លេចភ្លាំង ជំងឺស្កន់ និងជំងឺធ្លាក់ទឹកចិត្ត អាចរីករាលដាល និងកាន់តែអាក្រក់ទៅៗ នៅពេលដែលពិភពលោកកាន់តែក្តៅខ្លាំងឡើងៗ។

នៅក្នុងការសិក្សាមួយដែលបានចេញផ្សាយ កាលពីថ្ងៃពុធ (ទី១៥ ខែឧសភា) អ្នកស្រាវជ្រាវសាកលវិទ្យាល័យ University College London (UCL) បានវិភាគនិពន្ធន៍ផ្នែកវិទ្យាសាស្ត្រប្រព័ន្ធប្រសាទ ដើម្បីបង្ហាញថា តើមហន្តរាយដែលបណ្ដាលមកពីកម្ដៅក្ដៅខ្លាំង និងបម្រែបម្រួលអាកាសធាតុ ជះឥទ្ធិពលលើជំងឺសរសៃប្រសាទសំខាន់ៗ និងបញ្ហាសុខភាពផ្លូវចិត្តកម្រិតណា។

អ្នកវិទ្យាសាស្ត្រទាំងនោះបានរកឃើញថា កត្តាបរិស្ថានមិនត្រឹមតែមានឥទ្ធិពលដល់ការរាតត្បាតនៃជំងឺប៉ុណ្ណោះទេ ប៉ុន្តែថែមទាំងអាចបង្កើនហានិភ័យចូលមន្ទីរពេទ្យ មានពិការភាព និងសូម្បីតែអាចឈានដល់ការបាត់បង់ជីវិតទៀតផង។

ផលប៉ះពាល់ពីការប្រែប្រួលអាកាសធាតុលើសុខភាព ត្រូវបានសិក្សាយ៉ាងហ្មត់ចត់ ជាពិសេស នៅពេលដែលទាក់ទងដល់ជំងឺឆ្លង និងជំងឺផ្លូវដង្ហើម។ ប៉ុន្តែវាក៏មានផលអាក្រក់ធ្ងន់ធ្ងរដល់សុខភាពសរសៃប្រសាទផងដែរ ដោយដំណើរការគ្រប់គ្រងសីតុណ្ហភាពរបស់រាងកាយ ទំនងជាដើរតួនាទីយ៉ាងសំខាន់ នៅក្នុងស្ថានភាពអាក្រក់តិចតួច ដែលបង្កឡើងដោយកម្ដៅក្ដៅខ្លាំង។

លោកសាស្ត្រាចារ្យ Sanjay Sisodiya មកពីវិទ្យាស្ថានប្រព័ន្ធប្រសាទ UCL Queen Square ដែលដឹកនាំការស្រាវជ្រាវនេះ បាននិយាយថា៖ «ដើម្បីឲ្យដំណើរការបានល្អត្រឹមត្រូវ ខួរក្បាលត្រូវតែរក្សានៅក្នុងរង្វង់ជួរសីតុណ្ហភាពដែលមើលទៅទំនងជាតូចចង្អៀត។ ប្រសិនបើខួរក្បាលមានជម្ងឺ នោះសមត្ថភាពខួរក្បាលក្នុងការគ្រប់គ្រងកម្តៅ ត្រូវបានធ្វើឲ្យមានគ្រោះថ្នាក់។ សាកយកអ្នកដែលមានជំងឺសរសៃប្រសាទ ហើយដាក់ពួកគេក្នុងកន្លែងក្ដៅខ្លាំងបំផុតនោះ អ្នកអាចមើលឃើញថា តើវាអាចធ្វើឲ្យជំងឺសរសៃប្រសាទរបស់ពួកគេកាន់តែធ្ងន់ធ្ងរកម្រិតណា»។

តែយ៉ាងណាក្ដី លោកសាស្ត្រាចារ្យ Sisodiya បានបន្ថែមថា ការស៊ើបអង្កេតបន្ថែមទៀត គឺត្រូវការជាចាំបាច់ចំពោះយន្តការពិតប្រាកដ ដែលភ្ជាប់ជំងឺសរសៃប្រសាទជាមួយនឹងសីតុណ្ហភាពឡើងខ្ពស់ជាងនេះ៕