ភ្នំពេញ៖ ក្រសួងរៀបចំដែនដី នគរូបនីយកម្ម និងសំណង់ នឹងធ្វើកិច្ចសហប្រតិបត្តិការជាមួយ ប្រទេសអូស្រ្ដាលី ក្នុងការលុបបំបាត់ទាំងស្រុង នៃការប្រើប្រាស់នូវសារធាតុអាបេស្ដុស នៅក្នុងវិស័យសំណង់ ខណៈសារធាតុនេះ បានបង្កមហន្តរាយជាច្រើនដល់អ្នកប្រើប្រាស់ ពិសេសគឺបង្កជំងឺមហារីកផ្លូវដង្ហើមក្នុងរយៈពេលវែង និងជាឃាតករលាក់មុខ ដែលបានសម្លាប់ប្រជាជនជាច្រើននាក់ ។

ក្នុងពេលដឹកនាំប្រតិភូភ្នាក់ងារ Australia Asbestos and Silica Safety and Eradication (ASSEA) ជួបពិភាក្សាការងារជាមួយឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក Pablo Kang ភារធារីនៃស្ថានទូតអូស្ត្រាលីប្រចាំកម្ពុជា លើកឡើងថា អូស្ត្រាលីបានចំណាយថវិកាជាច្រើនពាន់លានដុល្លារ កំពុងលុបបំបាត់នូវការប្រើប្រាស់សាធារអាបេស្ដុស ដើម្បីជួយជីវិតមនុស្ស នេះក៏ដោយសារការគិតគូមិនបានវែងឆ្ងាយតាំងពីដំបូង ហើយសូមដល់ប្រទេសកម្ពុជា ដែលរាជរដ្ឋាភិបាលបានចេញសេចក្តីសម្រេចបញ្ឈប់ការប្រើប្រាស់ នូវសារធាតុអាសបេស្តុស ក្នុងឆ្នាំ២០២៥ខាងមុខនេះ ។ 

លោកបានបន្តថា សារធាតុអាសបេស្តុសនេះ បានបង្កមហន្តរាយជាច្រើនដល់អ្នកប្រើប្រាស់ ពិសេសគឺបង្កជំងឺមហារីកផ្លូវដង្ហើមក្នុងរយៈពេលវែង និងជាឃាតករលាក់មុខដែលបានសម្លាប់ប្រជាជនជាច្រើននាក់ ហើយនៅលើពិភពលោកមានប្រទេសចំនួន៦៩ ដែលបានហាមឃាត់ការនាំចូលទាំងស្រុងនូវសារធាតុអាសបេស្តុស ប៉ុន្តែជាអកុសល នៅមានបណ្តាប្រទេសមួយចំនួន ដែលមិនទាន់មានផែនការហាមឃាត់ ឬលុបបំបាត់នៅឡើយ ។ 

ជាមួយនេះ លោកភារធារី បានចង្អុលបង្ហាញឱ្យភ្នាក់ងារ ASSEA កិច្ចសហប្រតិបត្តិការជាមួយក្រសួងរៀបចំដែនដី និងស្ថាប័នពាក់ព័ន្ធ យល់ដឹងកាន់តែស៊ីជម្រៅអំពីផលប៉ះពាល់នៃសារធាតុអាសបេស្តុស ដើម្បីឈានទៅដល់ការលុបបំបាត់ការប្រើប្រាស់ទាំងស្រុង ដោយការលុបបំបាត់ការប្រើប្រាស់សារធាតុនេះ គឺត្រូវការការចូលរួមពីស្ថាប័នពាក់ព័ន្ធទាំងអស់ ពិសេសគួរតែមានស្ថាប័នណាមួយដឹកនាំធ្វើកិច្ចការងារនេះ ។

ឯកឧត្តមឧបនាយករដ្ឋមន្ត្រី មានប្រសាសន៍ថា ក្រសួងបាននឹងកំពុងពិនិត្យមើលការរៀបចំបទដ្ឋានបច្ចេកទេសស្តង់ដារសំណង់ ដើម្បីឱ្យសមស្របនឹងការវិវត្ត របស់វិស័យសំណង់នៅកម្ពុជា ព្រោះរាជរដ្ឋាភិបាល បានធ្វើកិច្ចការងារជាច្រើ នដើម្បីលើកកម្ពស់ការយល់ដឹងជាសាធារណៈអំពីផលប៉ះពាល់របស់សារធាតុអាសបេស្តុស ហើយកម្ពុជាបានប្រែក្លាយពីប្រទេស ដែលធ្លាប់តែផ្តោតលើការកាត់បន្ថយភាពក្រីក្រ ការងារយេនឌ័រ និងបម្រែបម្រួលអាកាសធាតុ ទៅជាប្រទេសមួយដែលប្រជាជនកំពុងផ្តោតការចាប់អារម្មណ៍លើគុណភាពនៃជីវិត និងការលើកកម្ពស់សុខមាលភាពសាធារណៈ ។

ឯកឧត្តមបន្តថា ដើម្បីចូលរួមលុបបំបាត់ និងបញ្ជ្រាបការយល់ដឹងអំពីសារធាតុអាសបេស្តុស ក្រសួងនឹងរៀបចំផែនការចំនួន៣ គឺទី១. លើកកម្ពស់ការយល់ដឹងជាសាធារណៈ, ទី២. រៀបចំសិក្ខាសាលាផ្សព្វផ្សាយ និងទី៣. ដឹកនាំកិច្ចប្រជុំជាមួយក្រសួង/ស្ថាប័នពាក់ព័ន្ធដូចជាក្រសួងពាណិជ្ជកម្ម, ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រសួងការងារ និងបណ្តុះបណ្តាលវិជ្ជាជីវៈ ដើម្បីសហការលើការងារនេះ ហើយនឹងធ្វើកិច្ចសហប្រតិបត្តិការជិតស្និទ្ធជាមួយរដ្ឋាភិបាលអូស្រ្តាលី ក្នុងការលុបបំបាត់ទាំងស្រុង នូវការប្រើប្រាស់សារធាតុអាសបេស្តុសក្នុងវិស័យសំណង់ និងសហការបន្ថែមផងដែរ លើវិស័យផ្សេងទៀត ពិសេសការតាក់តែងបទដ្ឋានគតិយុត្ត ក្នុងវិស័យសំណង់ និងការចែករំលែកបទពិសោធន៍របស់អូស្ត្រាលី ក្នុងការរៀបចំទីក្រុង ដើម្បីលើកកម្ពស់គុណភាពជីវិតរ បស់ប្រជាពលរដ្ឋ ៕

អត្ថបទ ៖ បាន សុខរិទ្ធិ