អតីតប្រធានាធិបតីអាមេរិកលោក Donald Trump បានផ្តល់ឲ្យកិច្ចព្រមព្រៀងការពារ Aukus នូវ «ការទទួលស្វាគមន៍យ៉ាងកក់ក្តៅ» អំឡុងពេលមានកិច្ចប្រជុំជាមួយលោក Scott Morrison ដែលអតីតនាយករដ្ឋមន្ត្រីអូស្ត្រាលី បាននិយាយថា ជាសញ្ញាមួយក្នុងចំណោមសញ្ញាសាធារណៈ អំពីទស្សនៈរបស់លោក Trump ចំពោះកិច្ចព្រមព្រៀងនេះ។

លោក Morrison ដែលបានចាកចេញពីតំណែងក្នុងឆ្នាំ២០២២ បានជួបលោក Trump កាលពីថ្ងៃទី១៤ ខែឧសភា នៅឯគេហដ្ឋានរបស់អតីតប្រធានាធិបតីអាមេរិក ក្នុងទីក្រុងញ៉ូវយ៉ក ហើយលោកបានបង្ហោះនៅបណ្ដាញសង្គម X ថា ជំនួបនេះបានធ្វើកិច្ចពិភាក្សា ដែលគ្របដណ្តប់លើកិច្ចព្រមព្រៀង Aukus ហើយនិងការមានឥទ្ធិពលកាន់តែខ្លាំងៗឡើង នៅឥណ្ឌូប៉ាស៊ីហ្វិក និងការគំរាមកំហែងដល់កោះតៃវ៉ាន់ពីសំណាក់ប្រទេសចិន។

កាលពីថ្ងៃទី១៥ ខែឧសភា លោក Morrison បាននិយាយថា៖ «ទាំងនេះគឺជាបញ្ហាដែលយើងបានពិភាក្សាជាប្រចាំ នៅពេលដែលយើងទាំង ២នាក់ នៅក្នុងតំណែង។ ជាថ្មីម្តងទៀត អតីតប្រធានាធិបតី បានបង្ហាញពីការដឹងគុណពិតប្រាកដរបស់លោក ចំពោះតម្លៃ ដែលលោកផ្ដល់ឲ្យសម្ព័ន្ធភាពអូស្ត្រាលី-អាមេរិក និងតួនាទីរួមគ្នានៃការគាំទ្រនូវអ្វីដែលមិត្តរបស់យើង គឺលោក Shinzo Abe ហៅថា តំបន់ឥណ្ឌូប៉ាស៊ីហ្វិកសេរី និងបើកចំហ»។

គួរបញ្ជាក់ថា លោក Trump បេក្ខជនមកពីគណបក្សសាធារណរដ្ឋដែលត្រូវបានសន្មត់ថា នឹងតទល់ជាមួយប្រធានាធិបតីលោក Joe Biden របស់គណបក្សប្រជាធិបតេយ្យ នៅការបោះឆ្នោតប្រធានាធិបតីខែវិច្ឆិកា មិនបានប្រកាសជាផ្លូវការនូវជំហររបស់លោក ពាក់ព័ន្ធនឹងកតិកាសញ្ញានេះទេ ហើយការិយាល័យរបស់លោក មិនបានឆ្លើយតបភ្លាមៗនោះឡើយ ចំពោះសំណួរអំពីកិច្ចប្រជុំនោះ។

សូមបញ្ជាក់បន្ថែមថា AUKUS គឺជាកតិកាសញ្ញាសន្តិសុខត្រីភាគី រវាងប្រទេសអូស្ត្រាលី ចក្រភពអង់គ្លេស និងសហរដ្ឋអាមេរិក ដែលបានចុះហត្ថលេខា នៅឆ្នាំ២០២១៕