ប្រទេសបារាំងបានបញ្ជាឱ្យទាហានទៅយាមកំពង់ផែ និងអាកាសយានដ្ឋានអន្តរជាតិក្នុងដែនដី នូវ៉ែល កាលេដូនី (New Caledonia )ក្នុងតំបន់មាហាសមុទ្រ ប៉ាស៊ីហ្វិករបស់ខ្លួន ខណៈការដាក់ប្រទេសក្នុងភាពអាសន្នបានចាប់ផ្តើមនៅថ្ងៃព្រហស្បតិ៍ ១៦ ឧសភានេះ បន្ទាប់ពីកុបកម្មរយៈពេល៣យប់បានធ្វើឱ្យមនុស្សបួននាក់ស្លាប់ និងរាប់រយនាក់រងរបួស។

ភាពចលាចលបានផ្ទុះឡើងបន្ទាប់ពីសភាជាតិរបស់ប្រទេសបារាំងបានគាំទ្រការផ្លាស់ប្តូរដែលមានជម្លោះចំពោះសន្លឹកឆ្នោត ដែលមេដឹកនាំជនជាតិដើមភាគតិច កាណាក(Kanak) និយាយថានឹងបន្ថយការបោះឆ្នោតរបស់ពួកគេ។

លោក ប្រធានាធិបតី Emmanuel Macron បានស្នើឱ្យរៀបចំកិច្ចពិភាក្សានៅថ្ងៃព្រហស្បតិ៍នេះ ជាមួយសមាជិកសភា ដែនដី នូវ៉ែល កាលេដូនី (New Caledonian) ខណៈក៏អនុម័តលើការប្រើប្រាស់កងកម្លាំងសន្តិសុខ និងបម្រាមគោចរពេលយប់ផងដែរ ដើម្បីបញ្ឈប់អំពើហិង្សាដ៏ធ្ងន់ធ្ងរបំផុតដែលបានមើលឃើញក្នុងរយៈពេល ៤ ទសវត្សរ៍មកនេះ។

ហាងលក់ទំនិញនានាត្រូវបានគេលួច ហើយអគារសាធារណៈត្រូវបានដុតបំផ្លាញក្នុងពេលមានអំពើហិង្សាពេលយប់។ ក្រុមមន្ត្រីបាននិយាយថា មនុស្សបួននាក់រួមទាំងកងអាវុធហត្ថម្នាក់ ត្រូវបានសម្លាប់។ ពួកគេបានបន្ថែមថា មនុស្សរាប់រយនាក់បានរងរបួស។

នូវ៉ែល កាលេដូនី ដែលស្ថិតនៅចន្លោះប្រទេសអូស្ត្រាលី និងប្រទេសកោះហ្វីជី គឺជាទឹកដីមួយក្នុងចំណោមទឹកដីជាច្រើនជុំវិញពិភពលោក ដែលនៅតែជាផ្នែកមួយនៃប្រទេសបារាំងក្នុងសម័យក្រោយអាណានិគម។ ដោយត្រូវបានដាក់អាណានិគមដោយប្រទេសបារាំង ចាប់ពីពាក់កណ្តាលទីពីរនៃសតវត្សទី១៩ ដែនដីនេះ មានឋានៈពិសេសមិនដូចទឹកដីក្រៅប្រទេសផ្សេងទៀតរបស់ប្រទេសបារាំងនោះទេ៕