ក្រុមឧទ្ទាមហ៊ួទីនៅប្រទេសយេម៉ែនកាលពីថ្ងៃពុធ បានអះអាងថា ខ្លួនបានកំណត់គោលដៅលើនាវាពិ  ឃាតរបស់កងទ័ពជើងទឹកអាមេរិក និងនាវាពាណិជ្ជកម្ម នៅសមុទ្រក្រហម។ ទោះបីជាយ៉ាងណាក៏ដោយ ការវាយប្រហារលើនាវាចម្បាំង ទំនងជាបានកើតឡើងជិតពីរថ្ងៃមុននេះ ហើយបានឃើញនាវានេះស្ទាក់ ចាប់មីស៊ីលដែលសំដៅលើវានោះ។

សេចក្តីថ្លែងការណ៍ចុងក្រោយពីក្រុមហ៊ួទី កើតឡើងនៅពេលដែលការវាយប្រហាររបស់ពួកគេលើការដឹកជញ្ជូនដែលបានរំខានដល់ពាណិជ្ជកម្ម តាមរយៈច្រករបៀងដ៏សំខាន់ដែល ឆ្ពោះទៅកាន់ព្រែកជីកស៊ុយអេ (Suez) និងសមុទ្រមេឌីទែរ៉ាណេ បានថយចុះក្នុងប៉ុន្មានសប្តាហ៍ថ្មីៗនេះ។ ទោះបីជាក្រុមឧទ្ទាមនេះ មិនបានទទួលស្គាល់ថាមានការថយចុះក៏ដោយ ក៏យោធាសហរដ្ឋអាមេរិក បានបញ្ជាក់ថា ការវាយប្រហារតាមអាកាស និងការស្ទាក់ចាប់មីស៊ីលរបស់ក្រុមហ៊ួទី បានរំខានដល់ការវាយលុករបស់ពួកគេ និងបានធ្វើឲ្យចំនួនអាវុធរបស់ពួកគេថយចុះផងដែរ។

កាលពីពេលថ្មីៗនេះ ក្រុមហ៊ួទី បាននិងកំពុងអះអាងពីការវាយប្រហារជាច្រើនថ្ងៃ។

អ្នកនាំពាក្យយោធារបស់ក្រុមហ៊ួទី លោកឧត្តមសេនីយ៍យត្រី Yahya Saree បាននិយាយថា ពួកឧទ្ទាមបានកំណត់គោលដៅលើនាវាពិឃាដ USS Mason ដោយមីស៊ីល ហើយបានបើកការវាយប្រហារលើនាវា ដែលលោកកំណត់ថា ជាទិសដៅនោះ ។ នាវាជាច្រើនគ្រឿង មានឈ្មោះក្នុងបញ្ជីដឹកជញ្ជូន។

នាវា Mason ជានាវាពិឃាតដែលបំពាក់ដោយមីស៊ីលតម្រង់គោលដៅ Arleigh Burke class បានស្ថិតនៅក្នុងសមុទ្រក្រហម និងតំបន់ធំទូលាយ ដែលជាផ្នែកមួយនៃក្រុមចម្រុះដឹកនាំដោយសហរដ្ឋអាមេរិក ដែលព្យាយាមរារាំងការវាយប្រហាររបស់ក្រុមហ៊ួទីលើការដឹកជញ្ជូន។ ទីបញ្ជាការកណ្តាលរបស់យោធាសហរដ្ឋអាមេរិក បាននិយាយថា កាលពីយប់ថ្ងៃចន្ទ នាវា Mason «បានចូលរួមដោយជោគជ័យ និងបានបំផ្លាញមីស៊ីលបាលិស្ទិក ប្រឆាំងនាវាដែលបាញ់ចេញដោយ(ក្រុមហ៊ូទី)ដែលគាំទ្រដោយអ៊ីរ៉ង់ពីប្រទេសយេម៉ែនពីខាងលើសមុទ្រក្រហម»។