​បាល់ទាត់៖ ​ក្រុម​ការពារ​ជើងឯក​ប្រេ​ស៊ី​លបាន​ឈានឡើង​វគ្គ​ផ្តាច់ព្រ័ត្រ​ ដណ្តើម​មេដាយ​មាស​អូឡាំពិក​ទីក្រុង​តូ​ក្យូ​ហើយ​ ក្រោយ​ជ័យជំនះ​លើ​ក្រុម​ម៉ិ​ក​ស៊ិ​កដោយ​បាល់ ១១​ម៉ែត្រ​កាត់សេចក្តី​។

​​បន្ទាប់ពី​គ្មាន​ក្រុម​ស៊ុត​បញ្ចូល​ទី​រយៈពេល ៩០នាទី និង​បន្ថែម ១៥នាទី​ពីរ​ដង​ទៀត ប្រេ​ស៊ី​ល និង​ម៉ិ​ក​ស៊ិ​ក​ត្រូវ​កាត់​សេចក្តី​រក​ក្រុម​ចាញ់ឈ្នះ​ដោយ​បាល់ ១១​ម៉ែត្រ​។ ​​អ្នកចាំទី​ប្រេ​ស៊ី​ល Santos ជួយសង្គ្រោះ​គ្រាប់​ទី១ របស់​ម៉ិ​ក​ស៊ិ​ក​ស៊ុត​ដោយ Eduardo Aguirre មុនពេល​ដែល Johan Vasquez ស៊ុត​បុក​បង្គោល​ទី​នៃ ២​គ្រាប់​ដំបូង​។ ​​ប្រេ​ស៊ី​ល​មិន​ភ្លាត់​ឡើយ​ក្នុង​បាល់ ១១​ម៉ែត្រ​នេះ​ដោយ​ស៊ុត​បញ្ចូល​ទី​សំរេច​ទាំង​ ៤​គ្រាប់​ដោយ Dani Alves, Gabriel Martinelli, Bruno Guimaraes និង Reinier ឱ្យ​ប្រេ​ស៊ី​ល​យកឈ្នះ​ម៉ិ​ក​ស៊ិ​ក ៤-១ ឡើង​វគ្គ​ផ្តាច់ព្រ័ត្រ​ដណ្តើម​មេដាយមាស​ជួប​ជាមួយ​អេ​ស្ប៉ា​ញ​។

​​ងាក​មក​អេ​ស្ប៉ា​ញ​បាន​ទំលាក់​ក្រុម​ម្ចាស់ផ្ទះ​ជប៉ុន ១-០ នៅ​ម៉ោង​បន្ថែម​នាទី​ទី១១៥ ទៅហើយ​ដោយ​កីឡាករ​បម្រុង Marco Asensio នៅ​កីឡដ្ឋាន Saitama​។ ​​នេះ​ជាការ​ឈានឡើង​វគ្គ​ផ្តាច់ព្រ័ត្រ​វិញ្ញាសា​បាល់ទាត់​ លើកដំបូងសំរាប់​អេ​ស្ប៉ា​ញ​នៅ​អូឡាំពិក តាំងពី​ឆ្នាំ២០០០ អូឡាំពិក​ទីក្រុង​ស៊ីដនី​ប្រទេស​អូស្ត្រាលី​ ដែល​បាន​ត្រឹម​ជើងឯក​រង​នៅពេលនោះ​៕

​អត្ថបទ​៖​នាង សុភា​វុ​ធ