ក្រុមមេដឹកនាំអារ៉ាប់ កំពុងប្រមូលផ្តុំគ្នានៅថ្ងៃព្រហស្បតិ៍នេះ នៅប្រទេសបារ៉ែនសម្រាប់កិច្ចប្រជុំកំពូលគ្របដណ្តប់ដោយសង្រ្គាមអ៊ីស្រាអែល-ហាម៉ាស ដែលបានកំពុងឆាបឆេះ នៅតំបន់ហ្កាហ្សាស្ទ្រីប ដោយគ្មានបទឈប់បាញ់។

ប្រមុខរដ្ឋ និងរដ្ឋាភិបាលកាលពីថ្ងៃពុធ បានចាប់ផ្តើមចុះចតនៅទីក្រុងម៉ាណាម៉ា រដ្ឋធានីនៃប្រទេសឈូង   សមុទ្រដែលមានទង់ជាតិនៃសមាជិកចំនួន ២២ប្រទេសរបស់សម្ព័ន្ធអារ៉ាប់ កំពុងបក់រវិចៗ។

នេះ គឺជាលើកទី១ហើយដែលប្លុកនេះ បានមកជួបប្រជុំគ្នា ចាប់តាំងពីកិច្ចប្រជុំកំពូលវិសាមញ្ញនៅទីក្រុងរីយ៉ាដ ជារដ្ឋធានីនៃប្រទេសអារ៉ាប៊ីសាអ៊ូឌីតជិតខាង ក្នុងខែវិច្ឆិកា ដែលក៏មានការចូលរួមពីមេដឹកនាំមកពី  អង្គការសហប្រតិបត្តិការឥស្លាម ដែលមានសមាជិកចំនួន ៥៧ប្រទេសដែលមានមូលដ្ឋាននៅទីក្រុងចេដដា (Jeddah) ប្រទេសអារ៉ាប៊ីសាអ៊ូឌីត។

នៅក្នុងកិច្ចប្រជុំនោះ មេដឹកនាំទាំងអស់ បានថ្កោលទោសចំពោះសកម្មភាព «ដ៏ព្រៃផ្សៃ»របស់កងកម្លាំងអ៊ីស្រាអែល នៅក្នុងតំបន់ហ្កាហ្សា ប៉ុន្តែបានបដិសេធមិនអនុម័តវិធានការសេដ្ឋកិច្ច និងនយោបាយដាក់ទណ្ឌកម្មប្រឆាំងនឹងប្រទេសនេះ បើទោះបីជាមានការខឹងសម្បាកាន់តែខ្លាំងនៅក្នុងតំបន់ និងការគាំទ្រយ៉ាងទូលំទូលាយសម្រាប់បុព្វហេតុប៉ាឡេស្ទីនក៏ដោយ។

អ្នកវិភាគជនជាតិកូវ៉ែតលោក ហ្សាហ្វឺ អាល់ អាជ្មី (Zafer al-Ajmi) បាននិយាយថា ការសម្រេចបែបនោះ អាចផ្លាស់ប្តូរ នៅពេលនេះ នៅពេលដែលការគាំទ្រ ត្រូវបានបង្កើតឡើងជាសកលសម្រាប់ដំណោះស្រាយរដ្ឋពីរ ដែលត្រូវបានតស៊ូមតិជាយូរមកហើយដោយបណ្តាប្រទេសអារ៉ាប់។