សហព័ន្ធកីឡាបាល់ទាត់ប្រទេសប្រេស៊ីល (CBF) បានពន្យារពេលការប្រកួតពីរជុំបន្ទាប់ របស់ក្រុមបាល់ទាត់កំពូលរបស់ប្រទេស ដោយសារតែទឹកជំនន់ធ្ងន់ធ្ងរ។ នៅក្នុងសេចក្តីថ្លែងការណ៍មួយដែលបានចេញផ្សាយកាលពីល្ងាចថ្ងៃពុធ សហព័ន្ធកីឡាបាល់ទាត់ប្រទេសប្រេស៊ីល (CBF) បាននិយាយថា សហព័ន្ធទទួលយកសំណើពីក្លឹបចំនួន១៥ ក្នុងចំណោមក្លឹបចំនួន២០ ដើម្បីផ្អាករដូវក្នុងកាលនេះ។

សេចក្តីថ្លែងការណ៍បាននិយាយថា យើងមិនអាចបំភ្លេចបានទេថា កីឡា និងសង្គមដើរទន្ទឹមគ្នា ហើយពុំអាចកាត់ផ្តាច់ចេញពីគ្នាក្នុងគ្រាដ៏លំបាកបែបនេះ សម្រាប់ប្រជាជនប្រេស៊ីលបានឡើយ។ ការផ្អាកនេះ មិនអនុវត្តចំពោះការប្រកួតផ្សេងទៀតទេ។

ការប្រកាសនេះ បានធ្វើឡើងខណៈកិច្ចខិតខំប្រឹងប្រែងជួយសង្គ្រោះ បានបន្តនៅក្នុងរដ្ឋ Rio Grande do Sul ភាគខាងត្បូង ដែលភាគច្រើននៅតែលិចលង់ដោយទឹកជំនន់។ កាលពីថ្ងៃពុធ អាជ្ញាធរ បាននិយាយថា ចំនួនអ្នកស្លាប់បានកើនឡើងដល់១៤៩នាក់ ខណៈមនុស្ស១០៨ នាក់ទៀត នៅបាត់ខ្លួន និងជាង ៦០០.០០០នាក់ ត្រូវភៀសខ្លួនចេញពីលំនៅឋាន។

ទឹកជំនន់ ដែលត្រូវបានគេចាត់ទុកថា ជាគ្រោះមហន្តរាយដ៏អាក្រក់បំផុតរបស់ប្រទេសប្រេស៊ីល ក្នុងរយៈពេល៨០ឆ្នាំមកនេះ បណ្តាលមកពីភ្លៀងធ្លាក់ខ្លាំងដែលបានចាប់ផ្តើមនៅថ្ងៃទី ២៩ ខែមេសា នាំឱ្យមានបំណាក់ដីរាលដាល និងបាក់ទំនប់វារីអគ្គិសនី។

សហព័ន្ធកីឡាបាល់ទាត់ប្រទេសប្រេស៊ីល (CBF) បានព្រមព្រៀង រួចហើយក្នុងការផ្អាកការប្រកួតនៅក្នុងរដ្ឋ Rio Grande do Sul ដែលមានព្រំប្រទល់ជាប់ប្រទេសអ៊ុយរ៉ាហ្គាយ និងអាហ្សង់ទីន យ៉ាងហោចណាស់២០ថ្ងៃ។