ដូចយុទ្ធជនគាំទ្រទួរគីរាប់រយនាក់ផ្សេងទៀត លោក Omar បានចាកចេញពីប្រទេសស៊ីរីភាគខាងជើងទៅកាន់ប្រទេសនីហ្សេដែលសម្បូរទៅដោយសារធាតុរ៉ែកាលពីឆ្នាំមុន ដោយចូលរួមជាមួយទាហានស៊ីឈ្នួលស៊ីរី ដែលត្រូវបានបញ្ជូនទៅប្រទេសអាហ្វ្រិកខាងលិច ដោយក្រុមហ៊ុនយោធាទួរគីឯកជនមួយ។

ប្រយុទ្ធជន Omar មានអាយុ ២៤ឆ្នាំ បានប្រាប់សារព័ត៌មាន AFP នៅលើកម្មវិធីផ្ញើសារ WhatsApp ពីប្រទេសនីហ្សេ ថា៖«ហេតុផលចម្បងដែលខ្ញុំចាកចេញ គឺដោយសារតែជីវិត មានការលំបាកខ្លាំង នៅក្នុងប្រទេសស៊ីរី»។

លោក Omar បាននិយាយថា នៅប្រទេសស៊ីរីភាគខាងជើង ពុំមានឱកាសការងារក្រៅពីការចូលរួមជាមួយក្រុមប្រដាប់អាវុធ និងរកប្រាក់ចំណូលបានមិនលើសពី ១.៥០០លីរ៉ាទួរគី (៤៦ដុល្លារ) ក្នុងមួយខែទេ ដោយស្នើសុំដូចអ្នកផ្សេងទៀតដែលសារព័ត៌មាន AFP បានសម្ភាសន៍ ត្រូវកំណត់អត្តសញ្ញាណដោយឈ្មោះក្លែងក្លាយដោយសារហេតុផលសុវត្ថិភាព។

ក្រុមអ្នកវិភាគ និយាយថា ទីក្រុងអង់ការ៉ាមានទំនាក់ទំនងខ្លាំងជាមួយរបបយោធាថ្មីក្នុងទីក្រុងនីញ៉ាម៉េ (Niamey) ដែលកាន់អំណាច ចាប់តាំងពីរដ្ឋប្រហារខែកក្កដា ឆ្នាំ ២០២៣។

ក្រុមឃ្លាំមើលសិទ្ធិមនុស្សស៊ីរី បាននិយាយថា កាលពីប៉ុន្មានខែថ្មីៗនេះ យុទ្ធជនយ៉ាងហោចណាស់ ១.000 នាក់ ត្រូវបានបញ្ជូនទៅកាន់ប្រទេសនីហ្សេ «ដើម្បីការពារគម្រោងនានា និងផលប្រយោជន៍របស់ប្រទេស   ទួរគី»។