អាហ្វហ្គានីស្ថាន៖ ក្រុមអ្នកស្រុក និងមន្ត្រីបាននិយាយថា ពួកតាលីបង់បានវាយសម្រុករុលទៅមុខ នៅក្នុងប្រទេសអាហ្វហ្គានីស្ថានភាគខាងត្បូងកាលពីថ្ងៃអង្គារ ដោយដណ្ដើមបានស្រុកចំនួន ៩ ក្នុងចំណោមស្រុក ១០ ក្នុងរដ្ឋធានីរបស់ខេត្ត Helmand។
កងកម្លាំងរដ្ឋាភិបាលអាហ្វហ្គានីស្ថាន បានបើកការវាយប្រហារតាមអាកាសដែលគាំទ្រដោយសហរដ្ឋអាមេរិក ក្នុងកិច្ចប្រឹងប្រែងទាំងអស់សង្ឃឹមដើម្បីការពារទីក្រុង Lashkar Gah។ ការដួលរលំទីក្រុង Lashkar Gah នឹងក្លាយជាចំណុចរបត់ដ៏សំខាន់មួយនៅក្នុងការវាយលុក ដែលក្រុមតាលីបង់បានធ្វើក្នុងរយៈពេលប៉ុន្មានខែចុងក្រោយនេះ ខណៈដែលកងកម្លាំងអាមេរិក និងណាតូបានបញ្ចប់ការដកខ្លួនចេញពីប្រទេស ដែលហែកហួរដោយសង្គ្រាមមួយនេះ។ វានឹងក្លាយជារដ្ឋធានីរបស់ខេត្តដំបូង ដែលក្រុមតាលីបង់វាយដណ្ដើមយកបានក្នុងរយៈពេលប៉ុន្មានឆ្នាំនេះ។ អ្នកស្រុកនៅក្នុងទីក្រុងនេះបានប្រាប់សារព័ត៌មាន AP តាមទូរស័ព្ទថា ការប្រយុទ្ធគ្នាបានធ្វើឱ្យពួកគេជាប់គាំងនៅខាងក្នុងផ្ទះ ហើយមិនអាចចេញទៅក្រៅរកការផ្គត់ផ្គង់ប្រចាំថ្ងៃបានទេ។ ពួកគេបាននិយាយថា យុទ្ធជនតាលីបង់បានចេញមកក្រៅដោយចំហនៅតាមដងផ្លូវ ហើយថាស្រុកទាំងអស់លើកលែងតែស្រុក Lashkar Gah ស្ថិតនៅក្រោមការគ្រប់គ្រងរបស់ពួកតាលីបង់។
ប្រភពពីសារព័ត៌ BBC និយាយថា សាកសពជាច្រើនបាននៅរាយប៉ាយតាមដងផ្លូវ ខណៈដែលការវាយប្រយុទ្ធគ្នាដណ្ដើមគ្រប់គ្រងទីក្រុងនេះនៅតែបន្ត រវាងពួកសកម្មប្រយុទ្ធ និងកងកម្លាំងរដ្ឋាភិបាល។ អង្គភាពកងកាម៉ង់ដូសម្រាំងត្រូវបានបញ្ជូនចេញពីរដ្ឋធានីកាប៊ុល ដើម្បីជួយកងកម្លាំងអាហ្វហ្គានីស្ថាន ខណៈរដ្ឋាភិបាលកំពុងកាន់កាប់អគាររដ្ឋាភិបាលសំខាន់ៗ រួមទាំងការិយាល័យនគរបាលក្នុងតំបន់ និងទីបញ្ជាការកងទ័ពមួយចំនួន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
