កងទ័ពអ៊ុយក្រែន បាននិយាយនៅថ្ងៃព្រហស្បតិ៍នេះថា ខ្លួនបានបញ្ឈប់ផ្នែកខ្លះនៃការឈានទៅមុខរបស់ រុស្ស៊ីនៅភាគឦសានដែលទីក្រុងមូស្គូ បានធានាការទទួលបានទឹកដីដ៏ធំបំផុតរបស់ខ្លួន ក្នុងរយៈពេល ១៨ ខែ ក្នុងសប្តាហ៍មុននេះ។

ទីក្រុងមូស្គូ បានបើកការវាយលុកជើងគោកទ្រង់ទ្រាយធំមួយឆ្លងព្រំដែនចូលទៅក្នុងតំបន់ខាគីវ កាលពី សប្តាហ៍មុន ជាចំណាត់ការមួយដ៏គួរឲ្យភ្ញាក់ផ្អើលមួយដែលបានជំរុញឲ្យកងកម្លាំងដែលកំពុងខ្វះអាវុធ ដកថយពីទីតាំងឈរជើងមួយចំនួន។

កងទ័ពរុស្ស៊ី បានដណ្តើមកាន់កាប់ទឹកដីអ៊ុយក្រែន ២៧៨ គីឡូម៉ែត្រក្រឡា (១០៧ ម៉ាយការ៉េ) ចន្លោះថ្ងៃទី ៩ និង ១៥ ខែឧសភាមនេះ ដែលភាគច្រើននៅតំបន់ខាគីវ ដោយសារព័ត៌មាន AFP បានគណនាដោយប្រើទិន្នន័យពីវិទ្យាស្ថានសម្រាប់ការសិក្សាសង្គ្រាម (ISW)។

នោះ គឺជាការដណ្តើមបានទឹកដីដ៏ធំបំផុត នៅក្នុងប្រតិបត្តិការតែមួយ ចាប់តាំងពីពាក់កណ្តាលខែធ្នូ ឆ្នាំ ២០២២ នៅពេលដែលទីក្រុងមូស្គូ បានឈានទៅមុខក្នុងតំបន់លូហ្គានស្ក៍ ( Lugansk) ភាគខាងកើត។

ប្រធានាធិបតីអ៊ុយក្រែនលោក វ៉ូឡូមៀ ហ្សេឡិនស្គី (Volodymyr Zelensky) បានជួបជាមួយមេដឹកនាំយោធានៅទីក្រុងខាគីវ នៅថ្ងៃព្រហស្បតិ៍នេះ ហើយបាននិយាយថា ស្ថានភាពគឺ «ពិបាកណាស់» ប៉ុន្តែ«ស្ថិតនៅក្រោមការគ្រប់គ្រង»។