តុលាការក្រុងសេអ៊ូល នៅថ្ងៃព្រហស្បតិ៍ (១៦ ឧសភា) បានច្រានចោលសំណើរបស់វេជ្ជបណ្ឌិត និងនិស្សិតពេទ្យដែលសុំឲ្យបញ្ឈប់ផែនការរបស់រដ្ឋាភិបាល ក្នុងការបង្កើនកូតាសាលាពេទ្យ ខណៈដែលការធ្វើកូដកម្មរយៈពេលជាច្រើនខែ ដោយក្រុមគ្រូពេទ្យហាត់ការ បានអូសបន្លាយ។

សូមរំលឹកថា គ្រូពេទ្យហាត់ការរាប់ពាន់នាក់ បាននាំគ្នាឈប់ធ្វើការ កាលថ្ងៃទី២០ ខែកុម្ភៈ ដើម្បីតវ៉ាចំពោះផែនការរបស់រដ្ឋាភិបាលដែលចង់បណ្តុះបណ្តាលគ្រូពេទ្យបន្ថែមទៀត ដោយបង្កឲ្យមានភាពចលាចល នៅក្នុងមន្ទីរពេទ្យ និងបង្ខំឲ្យមានការលុបចោលការព្យាបាលសំខាន់ៗ ក្នុងនោះរួមទាំងការព្យាបាលដោយប្រើគីមីផងដែរ។

ដោយលើកឡើងពីកង្វះខាត និងចំនួនប្រជាជនដែលមានវ័យចំណាស់យ៉ាងឆាប់រហ័ស រដ្ឋាភិបាលកំពុងស្វែងរកការបណ្តុះបណ្តាលនិស្សិតពេទ្យរាប់រយនាក់បន្ថែមទៀតជារៀងរាល់ឆ្នាំ ដែលជំរុញឲ្យមានប្រតិកម្មតបពីក្រុមគ្រូពេទ្យ និងនិស្សិតពេទ្យ ដែលបានយកសំណុំរឿងនេះឡើងទៅតុលាការ ក្នុងគោលបំណងព្យាយាមទប់ស្កាត់ការកែប្រែនេះ។

គួរបញ្ជាក់ថា តុលាការរដ្ឋបាលកាលពីខែមុន បានកាត់ក្តីរួចហើយ ដោយគាំទ្ររដ្ឋាភិបាល ហើយតុលាការជាន់ខ្ពស់ទីក្រុងសេអ៊ូល នៅថ្ងៃព្រហស្បតិ៍ បានបដិសេធជាថ្មីម្តងទៀតនូវសំណើរបស់ក្រុមវេជ្ជបណ្ឌិត និងនិស្សិតពេទ្យ។ តុលាការបានឲ្យដឹងនៅក្នុងសេចក្តីថ្លែងការណ៍មួយថា ពាក្យស្នើសុំ «ត្រូវបានច្រានចោល ដោយសារវាត្រូវបានគេកំណត់ថា ពួកគេមិនមែនជាភាគីផ្ទាល់ ដែលរងផលប៉ះពាល់ដោយផ្ទាល់ពីការសម្រេចរបស់សំណុំរឿងនេះទេ»។

ខណៈពេលដែលទទួលស្គាល់ថា និស្សិតពេទ្យ ពោលគឺមិនដូចគ្រូពេទ្យហាត់ការ ឬសាស្ត្រាចារ្យ មានសិទ្ធិធ្វើសំណើនេះនោះ តុលាការបានលើកឡើងថា ការបង្កើនកូតាសាលាពេទ្យ គឺជា «មូលដ្ឋានគ្រឹះដ៏សំខាន់សម្រាប់ការងើបឡើងវិញនៃការថែទាំវេជ្ជសាស្រ្តសំខាន់ៗ និងក្នុងតំបន់»៕