យោធានីហ៊្សេរីយ៉ា បាននិយាយកាលពីថ្ងៃព្រហស្បតិ៍ (១៦ ឧសភា) ថា យ៉ាងហោចណាស់ជនដែលសង្ស័យថាជាភេរវករចំនួន ២២៧ នាក់ ត្រូវបានសម្លាប់ដោយទាហាននៅក្នុងការវាយឆ្មក់ប្រឆាំងភេរវកម្មជាច្រើន ដែលបានធ្វើឡើងនៅទូទាំងប្រទេសនីហ៊្សេរីយ៉ា ក្នុងសប្តាហ៍កន្លងទៅ។

លោក អេដវើដ ប៊ូបា (Edward Buba) អ្នកនាំពាក្យយោធាបានប្រាប់អ្នកយកព័ត៌មាននៅទីក្រុង អាប៊ូហ៊្សា រដ្ឋធានីនីហ៊្សេរីយ៉ាថា មនុស្សសរុបចំនួន ៥២៩ នាក់ផ្សេងទៀតត្រូវបានចាប់ខ្លួនដោយកងទ័ព ដែលបានវាយឆ្មក់តំបន់កន្លែងលាក់ខ្លួនរបស់ភេរវករជាច្រើននៅក្នុងប្រទេសអាហ្វ្រិក ដែលមានប្រជាជនច្រើនជាងគេ។

លោក ប៊ូបា បាននិយាយថា ក្នុងអំឡុងពេលនោះ កងទ័ពបានដោះលែងអ្នកដែលត្រូវបានចាប់ជំរិតយ៉ាងតិច ២៥៣ នាក់ នៅទូទាំងប្រទេស ដោយបន្ថែមថា អាវុធសរុបចំនួន ២៣១ ដើម និងគ្រាប់រំសេវចំនួន ៦.៤៤១ គ្រាប់ត្រូវបានទាហានរកឃើញ។

ប្រទេសហ៊្សេរីយ៉ា បានប្រឈមមុខនឹងការវាយប្រហារដែលសង្ស័យថាធ្វើឡើងដោយក្រុមភេរវករ និងការចាប់ជំរិតជាបន្តបន្ទាប់ ដែលនាំឱ្យរដ្ឋាភិបាលបង្កើនកិច្ចខិតខំប្រឹងប្រែងបោសសម្អាតក្រុមប្រដាប់អាវុធទាំងនោះ៕