នៅថ្ងៃទី១៧ ខែឧសភានេះ ក្រសួងទេសចរណ៍ និងភាគីពាក់ព័ន្ធ បានបើកសិក្ខាសាលា​ផ្តល់​សុពលភាព​គុណវឌ្ឍិជាតិវិជ្ជាជីវៈទេសចរណ៍កម្រិត២ សញ្ញាបត្រកម្រិត១ C1 សម្រាប់ជំនាញការិយាល័យជួរមុខ និង​ជំនាញ​សេវា​កម្មម្ហូបអាហារ និងភេសជ្ជៈ ដែលជំនាញទេសចរណ៍ទាំង២ នឹងដាក់​បញ្ចូល​កម្ម​វិធី​បណ្តុះ​បណ្តាល​ជំនាញ​វិជ្ជាជីវៈជូនយុវជន ១លាន៥សែននាក់របស់រាជរដ្ឋាភិបាល តាមសាលាTVET នៅពេល​ឆាប់​នេះ​។

ឯកឧត្តម ប៉ាក សុខុម រដ្ឋលេខាធិការក្រសួងទេសចរណ៍ ថ្លែងថា នៅថ្ងៃនេះ មន្ត្រីជំនាញមកពីស្ថាប័ន ឯកជន និងអង្គការស្វីសខនថាក់ និងភាគីពាក់ព័ន្ធនានាទៀត បានបើក​កិច្ច​ភាក្សា​ផ្តល់​សុពល​ភាព​គុណវុឌ្ឍិ​ជាតិវិជ្ជាជីវៈទេសចរណ៍កម្រិត២ សញ្ញាបត្រកម្រិត១ C1 លើជំនាញការិយាល័យជួរមុខ និង ជំនាញ​សេវាកម្មម្ហូបអាហារ និងភេសជ្ជៈ ដើម្បីបើក​ច្រក​ជូន​យុវជន​នានា​ទទួល​បាន​ឱកាស​សិក្សា​ពេញ​មួយ​ជីវិត មានសញ្ញាបត្រជំនាញវិជ្ជាជីវៈទេសចរណ៍មួយត្រឹមត្រូវ និងទទួលបានឱកាសការងារ ប្រាក់​ខែ​សមរម្យ ក្នុងវិស័យទេសចរណ៍។

ឯកឧត្តម ប៉ាក សុខុម ថ្លែងថា ក្រសួងទេសចរណ៍ក្រោមកិច្ចសហការជាមួយអង្គការ Swisscontact ក្នុង​ដំណាក់​កាល​ទី២ កន្លងមកនេះ គណៈកម្មការគ្រប់គ្រងគម្រោង ហូកា នៃក្រសួងទេសចរណ៍ បាន​ធ្វើ​ការ​បណ្តុះ​បណ្តាលយុវជនកម្ពុជាបានចំនួនសរុប ៤,៥៥៦ នាក់ លើជំនាញគេហកិច្ច ការិយាល័យជួរមុខ សេវា​កម្មម្ហូបអាហារនិងភេសជ្ជៈ ឆុងកាហ្វេ ចុងភៅ មគ្គុទ្ទេសក៍ទេសចរណ៍សហគមន៍ គ្រូបង្គោល និង​អ្នក​វាយ​តម្លៃ​បង្គោល ហូកា នៅតាមបណ្តាខេត្តគោលដៅគម្រោងចំនួន១០។

ឯកឧត្តម បន្តថា នៅក្នុងដំណើការអនុវត្តគម្រោងហូកា ដំណាក់កាលទី៣ ឆ្នាំ២០២៤-២០២៨ ខាង​មុខ​នេះ ក្រសួងទេសចរណ៍ នឹងជំរុញរៀបចំគុណវុឌ្ឍិជាតិដល់កម្រិត៤ សញ្ញាបត្រវិជ្ជាជីវៈ៣ ដែល​មាន​តម្លៃ​សមមូល​ទៅ​នឹងសញ្ញាបត្រមធ្យមសិក្សាទុតិយភូមិ (បាក់ឌុប)។

លោក Christian Volker Ide(គ្រីស្ទិន វូឃ័ អីដេ) ប្រធានកម្មវិធីអភិវឌ្ឍន៍ជំនាញ នៃអង្គការ Swiss Contact ថ្លែងថា មកដល់បច្ចុប្បន្ន ទីភា្នក់ងារស្វីស សម្រាប់ការអភិវឌ្ឍ និងសហប្រតិបត្តិការ នៃ​រដ្ឋាភិបាលស្វីស បានផ្តល់ជំនួយអភិវឌ្ឍមូលធនមនុស្សក្នុងវិស័យទេសចរណ៍ ជាពិសេស ជំរុញ​អនុវត្ត​កម្ម​វិធី​បណ្តុះបណ្តាលបដិសណ្ឋារកិច្ចកម្ពុជា Hoka ហើយស្វីស​ខនថាក់​ជំរុ​ញ​ឲ្យ​មាន​ជំនាញ​ទេសចរណ៍​ផ្សេង​ៗ​ទៀត មានផ្តល់ការបង្រៀន​ជូន​យុវជន​បន្ថែម​នៅ​តាម​សាលា​TVET នៃ​ក្រសួង​ការងារ និង​បណ្តុះ​បណ្តាល​វិជ្ជា​ជីវៈផងដែរ៕  អត្ថបទ ស៊ុម សុខជា