បាល់ទាត់៖ FIFA បាន​សំរេច​ដាក់​ពិន័យ ​អតីត​ប្រធាន​សហព័ន្ធ​បាល់ទាត់​ទ្វីបអាហ្វ្រិក​ លោក Issa Hayatou បណ្ដោះអាសន្ន​កាលពី​ថ្ងៃ​អង្គារ​ដោយ​ចោទ​ថា ​បាន​ប្រព្រឹត្ត​ខុស​នៅ​ក្នុង​កិច្ចព្រមព្រៀង​ពាណិជ្ជកម្ម​សម្រាប់​បាល់ទាត់​អាហ្វ្រិក​។​

​លោក Hayatou ដែលជា​ប្រធាន​សហព័ន្ធ​កីឡាបាល់ទាត់​អាហ្វ្រិក​អស់​រយៈពេល ២៩ឆ្នាំ​រហូតដល់​ឆ្នាំ២០១៧ ត្រូវបាន​ពិន័យ​ ១ឆ្នាំ​ពីបទ​រំលោភ​លើ​ច្បាប់​នៃ​កាតព្វកិច្ច​ស្មោះត្រង់​។​ ​ក្រៅពីនោះ​លោក​ក៏ត្រូវ​បាន​ពិន័យ​ជា​ប្រាក់​ចំនួន ៣០,០០០ហ្វ្រ​ង់​ស្វី​ស (៣៣,០០០ ដុល្លារ​) ទោះបីជា​វា​មិន​ច្បាស់​ថា FIFA អាចអនុវត្ត​ការទូទាត់​យ៉ាងដូច​ម្តេចក៏ដោយ​។​ Hayatou គឺជា​អនុប្រធាន FIFA យូរអង្វែង​ម្នាក់ និង​ជា​ប្រធាន​ឈរជើង​អស់​រយៈពេល​ជាច្រើន​ខែ នៃ​ការព្យួរ​ការងារ​របស់​លោក Sepp Blatter នៅ​ខែតុលា​ឆ្នាំ២០១៥ និង​ការបោះឆ្នោត​រើស​ប្រធាន​ថ្មី​ លោក Gianni Infantino បួន​ខែ​ក្រោយមក​។​ ​បុរស​ជនជាតិ​កា​មេ​រូ​ន​វ័យ ៧៤ឆ្នាំ​រូបនេះ​បាន​បាត់បង់​តំណែង​ប្រធានាធិបតី CAF ក្នុង​ឆ្នាំ២០១៧ ក្នុងការ​បោះឆ្នោត​ចាញ់​លោក Ahmad Ahmad នៃ​ប្រទេស​ម៉ា​ដា​ហ្គា​ស្កា ដែល​ត្រូវបាន​គាំទ្រ​ដោយ​លោក Infantino។​

​បច្ចុប្បន្ន​លោក Ahmad កំពុង​ជាប់​បម្រាម​រយៈពេល​ពីរ​ឆ្នាំ​ បន្ទាប់ពី​ការស៊ើបអង្កេត​លើ​ការធ្វើ​ខុស​ផ្នែក​ហិរញ្ញវត្ថុ​ ដោយ​គណៈកម្មាធិការ​ក្រមសីលធម៌​របស់ FIFA​។ ករណី​នោះបាន​បញ្ចប់​បេក្ខភាព​របស់គាត់ ​ដើម្បី​ឈរឈ្មោះ​សម្រាប់​អាណត្តិ​ទី​ពីរ​។​ ​ប្រធាន CAF ថ្មី​គឺ​មហាសេដ្ឋី​អាហ្វ្រិក​ខាងត្បូង Patrice Motsepe ដែល​ត្រូវបាន​ជ្រើសតាំង​កាលពី​ខែមីនា​។​ ​គេ​មិនទាន់​ច្បាស់​ថា​ តើ​ការដាក់ពិន័យ​របស់ FIFA នឹង​ប៉ះពាល់​ដល់​សមាជិកភាព​កិត្តិយស​របស់ Hayatou នៃ​គណៈកម្មាធិការ​អូឡាំពិក​អន្តរជាតិ​ ឬ​យ៉ាងណា​៕

​អត្ថបទ​៖​នាង សុភា​វុ​ធ