​អាមេរិក៖ លោក​ប្រធានាធិបតី Joe Biden បាន​អំពាវនាវ​ឱ្យ​លោក Andrew Cuomo លាលែង​ពី​តំណែង ​បន្ទាប់ពី​ការស៊ើបអង្កេត​ឯករាជ្យ​មួយ​ដែល​រក​ឃើញ​ថា ​អភិបាល​រដ្ឋ New York បាន​បៀតបៀន​កេរខ្មាស​ស្ត្រី​ជាច្រើន​នាក់​។​

​ការ​ថ្កោលទោស​របស់​លោក Biden ចំពោះ​លោក Cuomo មាន​ឡើង​ប៉ុន្មាន​ម៉ោង បន្ទាប់ពី​រដ្ឋអាជ្ញា​ប្រចាំ​រដ្ឋ​លោក Letitia James បាន​និយាយ​ថា ​អភិបាល​រដ្ឋ​រូប​នេះ​បាន​រំលោភច្បាប់​រដ្ឋ និង​សហព័ន្ធ​។​ ​ជា​ការ​ឆ្លើយតប​លោក Cuomo បាន​បដិសេធ​ថា ​ខ្លួន​មិន​ប៉ះពាល់​នរណា​ម្នាក់​ដោយ​មិន​សមរម្យឡើយ ហើយ​ប្ដេជ្ញា​បន្ត​កាន់​តំណែង​។​ ឥឡូវនេះ​លោក Cuomo អាច​ត្រូវ​បាន​ចោទប្រកាន់​ទម្លាក់​តំណែង និង​កំពុង​ប្រឈម​នឹង​ការស៊ើបអង្កេត​ព្រហ្មទណ្ឌ​ដាច់ដោយ​ឡែក​មួយ​ផង​ដែរ​។​

​លោក Biden បាន​ប្រាប់​អ្នកយកព័ត៌មាន​នៅ​ឯ​សេត​វិមាន​កាលពី​ថ្ងៃ​អង្គា​រថា ខ្ញុំ​គិត​ថា អភិបាលក្រុង​រូប​នេះ​គួរតែ​លាលែង​ពី​តំណែង​។ ខ្ញុំ​យល់ថា ​អង្គ​នីតិ​បញ្ញត្តិ​របស់​រ​ដ្ឋ​អាច​សម្រេច​ក្នុង​ការ​ចោទប្រកាន់​។ ខ្ញុំ​មិន​ដឹង​ទេ តាមពិត​ខ្ញុំ​មិនបាន​អាន​ទិន្នន័យ​ទាំងអស់​នោះ​ទេ​។ ការស៊ើបអង្កេត​របស់​រដ្ឋអាជ្ញា​ត្រូវ​បាន​ស្នើ​កាលពី​ឆ្នាំមុន បន្ទាប់ពី​ស្ត្រី​ជាច្រើន​នាក់​បាន​ចេញមុខ​ចោទប្រកាន់​ ពី​បទ​រំលោភបំពាន​ផ្លូវ​ភេទ​ពី​សំណាក់​អភិបាលក្រុង​រូប​នេះ​៕

អត្ថបទ៖ សុខមាន