អង្គការសហប្រជាជាតិ (UN) កាលពីថ្ងៃព្រហស្បតិ៍ (១៦ ឧសភា) បានចាត់ទុកការចែកចាយជំនួយមនុស្សធម៌ស្ថិតក្នុងស្ថានភាព «ស្ទើរតែមិនអាចទៅរួច» នៅក្នុងតំបន់ហ្កាហ្សាស្ទ្រីប ស្របពេលមានសង្រ្គាមដែលកំពុងបន្តរវាងអ៊ីស្រាអែល និងចលនាតស៊ូអ៊ីស្លាម ហាម៉ាស ដែលបានអូសបន្លាយពេលជាង ២០០ ថ្ងៃ។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា ស្ថានភាពដ៏លំបាកនៃការចែកចាយជំនួយមនុស្សធម៌នៅក្នុងតំបន់ហ្កាហ្សា ដោយសារតែការផ្គត់ផ្គង់ប្រេងមិនទៀងទាត់ និងការរំខានការទំនាក់ទំនង ខណៈពេលមានការប្រយុទ្ធគ្នាកាន់តែខ្លាំងក្លាឡើងនៅទីនោះរវាងភាគីជម្លោះ។

ការរិយាល័យជំនួយមនុស្សធម៌ OCHA នេះបាននិយាយនៅក្នុងសេចក្តីថ្លែងការណ៍មួយដែលត្រូវបានបង្ហោះនៅលើវេទិកាប្រព័ន្ធផ្សព្វផ្សាយសង្គម X ថា ច្រកឆ្លងកាត់សំខាន់ៗសម្រាប់ជំនួយទៅកាន់តំបន់ហ្កាហ្សា ត្រូវបានបិទអស់រយៈពេលជាច្រើនថ្ងៃ ហើយឥឡូវនេះការចូលទៅកាន់តំបន់ហ៊ុមព័ទ្ធប៉ាឡេស្ទីន មិនមានសុវត្ថិភាព ឬមិនអាចធ្វើទៅរួចនោះទេ។

ទីភ្នាក់ងារនេះ និងអង្គការមនុស្សធម៌ផ្សេងទៀតបានព្រមានពីផលប៉ះពាល់ដ៏មហន្តរាយនៃការបិទច្រកឆ្លងកាត់ដល់ជនជាតិប៉ាឡេស្ទីនជាង ២ លាននាក់ នៅក្នុងតំបន់ហ្កាហ្សា ដែលរងគ្រោះដោយសង្គ្រាមដ៏បង្ហូរឈាមរវាងកងកម្លាំងអ៊ីស្រាអែល និងក្រុមសកម្មប្រយុទ្ធហាម៉ាស៕