បន្ទាយមានជ័យ៖ ឯកឧត្ដម សេរី កុសល សមាជិកគណៈកម្មាធិការកណ្តាល អនុប្រធានក្រុមការងារគណបក្សចុះមូលដ្ឋានខេត្តបន្ទាយមានជ័យ និងជាប្រធាន គណៈបញ្ជាការយុទ្ធនាការ ឃោសនាបោះឆ្នោតជ្រើសរើសក្រុម​ ប្រឹក្សារាជធានីខេត្ត ក្រុង ស្រុក ខណ្ឌ បានអញ្ជើញជាអធិបតីភាពដ៏ខ្ពង់ខ្ពស់បើកយុទ្ធនាការឃោសនា​បោះឆ្នោតជ្រើសរើស​ក្រុមប្រឹក្សាខេត្ត ក្រុមប្រឹក្សាស្រុក អាណត្តិទី៤ នៅស្រុកភ្នំស្រុក នៅថ្ងៃទី១៧ ខែឧសភា ឆ្នាំ២០២៤។

នាឱកាសនោះ ឯកឧត្តម ក៏បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចពញាចក្រី ហេង សំរិន សម្តេចអគ្គមហាសេនាបតីតេជោ ហ៊ុន សែន សម្តេចមហាវរធិបតី ហ៊ុន ម៉ាណែត ថ្នាក់ដឹកនាំកំពូលគណបក្សប្រជាជនកម្ពុជា ជូនដល់បោះឆ្នោតទាំងអស់ដោយក្ដីនឹករលឹក។

ក្នុងនោះឯកឧត្តម ក៏បានថ្លែងការអរគុណចំពោះសមាជិក-សមាជិកា ដែលបានរួមសុខរួមទុក្ខ​ជាមួយ​គ្នាគ្រប់កាលៈទេសៈ ឥតងាករេ ជាមួយគណបក្សប្រជាជនកម្ពុជា តាំងដើមរៀងមក។ ឯកឧត្តម ក៏បានលើកឡើងអំពីគោលនយោបាយសំខាន់ៗរបស់គណបក្សប្រជាជនកម្ពុជា ដោយក្នុងរយៈពេលជាង៤០ឆ្នាំមកនេះ ​កម្ពុជាមានការរីកចម្រើនយ៉ាងខ្លាំង ដល់ក្រោមការដឹក​នាំ​របស់គណបក្សប្រជាជនកម្ពុជា ដោយបាននាំមកនូវសន្តិភាព ​ស្ថិរភាពនយោបាយ និងមានការ​អភិវឌ្ឍរីកចម្រើនលើគ្រប់វិស័យ។​ ជាពិសេសគណបក្សប្រជាជនកម្ពុជា ប្តេជ្ញា​អនុវត្តកម្មវិធី​នយោបាយ​របស់សំខាន់ៗ ឱ្យបានសម្រេចជោគជ័យទាំងនៅថ្នាក់ជាតិ​ ទាំងនៅថ្នាក់ក្រោមជាតិ ដើម្បីធានា ​ដល់ការថែរក្សាសន្តិភាព និងស្ថិរភាព ការការពារឯករាជ្យ អធិបតេយ្យ ​បូរណភាពទឹកដី និងកសាងព្រះរាជាណាចក្រកម្ពុជា ​ជារដ្ឋប្រជាធិបតេយ្យសេរី​ ពហុបក្សដ៏រឹងមាំដែលផ្អែកលើច្បាប់ មានការគោរពសិទ្ធិ ​មនុស្សយ៉ាងខ្ជាប់ខ្ជួន មានសេដ្ឋកិច្ចរីកចម្រើនលឿន ធ្វើឱ្យប្រជាជនកម្ពុជា​គ្រប់ក្រុម​គ្រួសារមានជីវភាព កាន់តែល្អប្រសើរឡើង ឥតឈប់ឈរ និង​រស់​នៅ​យ៉ាង​សុខដុមរមនា​ក្នុងសង្គម៕