ប្រធានអាជ្ញាធរដែនដីប៉ាឡេស្ទីន លោក ម៉ាសឃ្មូដ អាបាស (Mahmoud Abbas) បាននិយាយនៅក្នុងកិច្ចប្រជុំកំពូលរបស់សម្ព័ន្ធអារ៉ាប់ កាលពីថ្ងៃព្រហស្បតិ៍ (១៦ ឧសភា) ថា រដ្ឋាភិបាលប៉ាឡេស្ទីន មិនបានទទួលការគាំទ្រផ្នែកហិរញ្ញវត្ថុដែលខ្លួនបានរំពឹងទុកពីដៃគូអន្តរជាតិ និងក្នុងតំបន់នោះទេ ខណៈអំពាវនាវឱ្យអ្នកទាំងនោះបន្តជួយដល់ផ្នែកហិរញ្ញវត្ថុសម្រាប់ដែនដីមួយនេះ។

លោក អាបាស បាននិយាយថា «ឥឡូវនេះវាបានក្លាយជារឿងសំខាន់ក្នុងការធ្វើឱ្យបណ្តាញសុវត្ថិភាពអារ៉ាប់សកម្ម ដើម្បីបង្កើនភាពធន់របស់ប្រជាជនរបស់យើង និងធ្វើឱ្យរដ្ឋាភិបាលអាចអនុវត្តភារកិច្ចរបស់ខ្លួនបាន»។

ការផ្តល់មូលនិធិរបស់អាជ្ញាធរប៉ាឡេស្ទីន ដែលជាស្ថាប័នអនុវត្តអភិបាលកិច្ចមានកម្រិតនៃតំបន់កាន់កាប់ វេសបែង (West Bank) ត្រូវបានដាក់កម្រិតយ៉ាងធ្ងន់ធ្ងរដោយជម្លោះលើការផ្ទេរប្រាក់ចំណូលពន្ធដែលអ៊ីស្រាអែល ប្រមូលជំនួសឱ្យប៉ាឡេស្ទីន។

អតីតនាយករដ្ឋមន្ត្រីអាជ្ញាធរប៉ាឡេស្ទីន លោក ម៉ូហាម៉េដ ស្តាយយ៉េ (Mohammad Shtayyeh) បាននិយាយថាមូលនិធិពីម្ចាស់ជំនួយអន្តរជាតិក៏ត្រូវបានកាត់បន្ថយផងដែរ ដោយធ្លាក់ចុះពី ៣០ ភាគរយនៃថវិកាប្រចាំឆ្នាំ ៦ ពាន់លានដុល្លារ មកនៅប្រហែល ១ ភាគរយប៉ុណ្ណោះ៕