ព្រះមហាក្សត្រ Abdullah នៃប្រទេសហ្ស៊កដានី កាលពីថ្ងៃព្រហស្បតិ៍ បានអំពាវនាវដល់រដ្ឋអារ៉ាប់ឲ្យ ប្រឈមមុខនឹងអ្វីដែលសម្ព័ន្ធមិត្តរបស់សហរដ្ឋអាមេរិក បានហៅការកើនឡើងគួរឲ្យព្រួយបារម្ភ ក្នុងការលុកលុយគ្រឿងញៀន និងអ្នករត់ពន្ធអាវុធពាក់ព័ន្ធនឹងកងជីវពលអ៊ីរ៉ង់ដែលប្រតិបត្តិការ នៅប្រទេសស៊ីរីភាគខាងត្បូង។

មន្ត្រីហ្ស៊កដានី ដូចជាសម្ព័ន្ធមិត្តលោកខាងលិចរបស់ពួកគេ បាននិយាយថា ប្រតិបត្តិការនេះ ត្រូវបានគ្រប់គ្រងដោយក្រុមហេសបូឡា (Hezbollah)នៅប្រទេសលីបង់ដែលគាំទ្រដោយអ៊ីរ៉ង់ និងកងជីវពលគាំទ្រអ៊ីរ៉ង់ផ្សេងទៀត ដែលគ្រប់គ្រងភាគច្រើននៃប្រទេសស៊ីរីភាគខាងត្បូង បន្ទាប់ពីបានគាំទ្រប្រធានាធិបតីស៊ីរី លោក បាសា អាល់អាសាដ (Bashar al-Assad) នៅក្នុងសង្គ្រាមស៊ីវិលដែលបានអូសបន្លាយ       ជិត ១៣ ឆ្នាំហើយនោះ។

ព្រះមហាក្សត្រ Abdullah បានមានព្រះបន្ទូលថា៖«យើងគួរតែប្រឈមមុខនឹងក្រុមសកម្មប្រយុទ្ធប្រដាប់អាវុធដែលប្រព្រឹត្តឧក្រិដ្ឋកម្មខុសច្បាប់ ជាពិសេសការរត់ពន្ធគ្រឿងញៀន និងអាវុធ ដែលជាអ្វីដែលប្រទេសហ្ស៊កដានី បានរារាំងអស់ជាច្រើនឆ្នាំមកនេះ» ដោយបានថ្លែងទៅកាន់ក្រុមមេដឹកនាំអារ៉ាប់ នៅក្នុងកិច្ចប្រជុំកំពូលដែលធ្វើឡើងនៅទីក្រុងម៉ាណាម៉ា ដោយលោក អាសាដ បានចូលរួមដែរនោះ។

ប្រភពពីប្រទេសហ្ស៊កដានី បានប្រាប់សារព័ត៌មានរ៉យទ័រថា លំហូរនៃអាវុធសម្ងាត់ភាគច្រើន ចូលទៅក្នុងប្រទេសនេះ ត្រូវបានចងភ្ជាប់ទៅនឹងទឹកដីប៉ាឡេស្ទីនខាងលិច ដែលកាន់កាប់ដោយអ៊ីស្រាអែលជាអ្នកជិតខាង។

ទោះជាយ៉ាងណា អាវុធមួយចំនួន ត្រូវបានគេទុកសម្រាប់ប្រើ ក្នុងប្រទេសហ្ស៊កដានី។

ប្រទេសស៊ីរីបដិសេធមិនសហការជាមួយក្រុមជីវពលដែលគាំទ្រដោយអ៊ីរ៉ង់លើសកម្មភាពខុសច្បាប់ ហើយអ៊ីរ៉ង់ និងក្រុមហេសបូឡា និយាយថា ការចោទប្រកាន់ពីការរត់ពន្ធនេះ គឺជាការប្រឌិតឡើងរបស់លោកខាងលិច។