មន្ត្រីក្រសួងការបរទេសអាមេរិកម្នាក់ បាននិយាយកាលពីថ្ងៃពុធថា ក្រសួងការបរទេសអាមេរិក បានដកគុយបាចេញពីបញ្ជីនៃប្រទេសដែលមិនមានកិច្ចសហប្រតិបត្តិការពេញលេញជាមួយសហរដ្ឋអាមេរិកលើកិច្ចប្រឹងប្រែងប្រឆាំងភេរវកម្ម។

កត្តាជាច្រើន បានរួមចំណែកដល់ការផ្លាស់ប្តូរស្ថានភាពរបស់ប្រទេសគុយបា។ មន្ត្រីរូបនេះ បាននិយាយថា សហរដ្ឋអាមេរិក និងគុយបា បានបន្តកិច្ចសហប្រតិបត្តិការលើការអនុវត្តច្បាប់នៅឆ្នាំ ២០២៣ រួមទាំងការប្រឆាំងភេរវកម្មផងដែរ។ ប្រទេសគុយបា ក៏លែងយល់ឃើញថា ខ្លួនបដិសេធមិនចូលរួមជាមួយកូឡុំប៊ីលើសំណើធ្វើបត្យាប័នសម្រាប់សមាជិកកងទ័ពរំដោះជាតិ (ELN) ដោយសារតែអគ្គមេធាវីរបស់ប្រទេសកូឡុំប៊ី បានប្រកាសថា ដីកាចាប់ខ្លួន នឹងត្រូវផ្អាក។

មន្ត្រីរូបនេះ បាននិយាយថា ជាលទ្ធផលនៃការផ្លាស់ប្តូរទាំងនេះ ក្រសួងការបរទេស បានកំណត់ថា ការបន្តការបញ្ជាក់របស់ប្រទេសគុយបាថា ជាប្រទេសដែលមិនមានកិច្ចសហប្រតិបត្តិការពេញលេញ» គឺមិនសមស្របតទៅទៀតទេ។

ក្រសួងការបរទេស នៅតែរួមបញ្ចូលប្រទេសកូរ៉េខាងជើង អ៊ីរ៉ង់ ស៊ីរី និងវ៉េណេហ្ស៊ុយអេឡា ក្នុងបញ្ជីប្រទេសដែលមិនសហការលើកិច្ចខិតខំប្រឹងប្រែងប្រឆាំងភេរវកម្ម។

ខណៈពេលដែលរដ្ឋាភិបាលគុយបា បានអបអរចំពោះការសម្រេចចិត្តរបស់ក្រសួងការបរទេស ខ្លួនក៏បានអំពាវនាវឲ្យសហរដ្ឋអាមេរិក ដកប្រទេសនេះចេញពីបញ្ជីមួយផ្សេងទៀត ដែលចាត់ទុកថា ប្រទេសនេះ ជា អ្នកឧបត្ថម្ភដល់ភេរវកម្ម។