រដ្ឋាភិបាលចោទប្រកាន់លោកថា ជា «បុគ្គលឃោរឃៅឯកោ» ពោលគឺជាបុគ្គលចម្លែកខុសពីគេ ដែលមិនខ្វល់ពីនរណាឡើយក្រៅតែពីខ្លួនឯង បន្ទាប់ខ្មាន់កាំភ្លើងរូបនោះបានបាញ់យ៉ាងហោចណាស់ ៤គ្រាប់លើនាយករដ្ឋមន្រ្តីស្លូវ៉ាគី លោក Robert Fico ។

តែការប៉ុនប៉ងធ្វើឃាត កាលពីថ្ងៃទី១៥ ខែឧសភានោះ បានធ្វើឲ្យមានការយកចិត្តទុកដាក់ចំពោះដំណើរការខុសប្រក្រតីរួមកាន់តែធំឡើងៗ នៅក្នុងប្រទេសស្លូវ៉ាគី។ ក្នុងប្រទេសនៅអឺរ៉ុបកណ្តាលមួយនេះ សង្គម និងវប្បធម៌នយោបាយមានការបែកបាក់គ្នាយ៉ាងខ្លាំងក្លា ដែលអំពើហិង្សាត្រូវបានបញ្ជាក់ដោយបុរសម្នាក់ដែលអាជ្ញាធរនិយាយថា ធ្វើសកម្មភាពតែម្នាក់ឯង បានក្លាយជាអាវុធមួយផ្សេងទៀត ដែលភាគីម្ខាងៗអាចវាយប្រហារគ្នា។

អតីតមន្ត្រីរដ្ឋាភិបាលដែលទទួលខុសត្រូវតាមដានព័ត៌មានមិនពិត គឺលោក Daniel Milo ដែលឥឡូវនេះធ្វើការឲ្យក្រុមហ៊ុនបច្ចេកវិទ្យាមួយ បាននិយាយថា៖ «មានកម្រិតនៃការបែកបាក់គ្នា ដែលមិនធ្លាប់មានពីមុនមកនៅក្នុងប្រទេសនេះ។ ខ្ញុំមិនធ្លាប់ដែលឃើញអ្វីដូចនេះពីមុនមកទេ»។

លោកបាននិយាយថា ជំងឺរាតត្បាតកូវីដ-១៩ បានកាន់តែធ្វើឲ្យខ្សែបន្ទាត់ដ៏តូចឆ្មារពីមុនធ្លាក់ចូលទៅក្នុងអ្វីដែលបានក្លាយទៅជាជំរុំអរិភាព ចាប់តាំងពីពេលនោះមក ដោយមានផ្លូវតិចតួចណាស់ ក្នុងការសម្របសម្រួល។ ប្រជាជនប្រហែលពាក់កណ្តាល បានស្វាគមន៍ចំពោះការចាក់វ៉ាក់សាំង ហើយពាក់កណ្តាលទៀតបានប្រកែក។ ហើយបន្ទាប់ពីជំងឺកូវីដ-១៩ កើតមានសង្រ្គាមនៅអ៊ុយក្រែន ដែលជាប្រភពនៃការបាក់បែកមួយផ្សេងទៀត។

ជនសង្ស័យត្រូវបានចាប់ខ្លួនភ្លាមៗ កាលពីថ្ងៃទី១៥ ខែឧសភា និងត្រូវបានចោទប្រកាន់ពីបទប៉ុនប៉ងមនុស្សឃាតគិតទុកជាមុន ប៉ុន្តែអាជ្ញាធរមិនបានបញ្ចេញឈ្មោះជាសាធារណៈនោះទេ។ សារព័ត៌មានស្លូវ៉ាគីដែលដកស្រង់ប្រភពពីនគរបាល បានកំណត់អត្តសញ្ញាណជននោះថា ជាជនចូលនិវត្តន៍វ័យ ៧១ឆ្នាំ ដែលមានចំណង់ចំណូលចិត្តលើកំណាព្យ និងការបង្កជម្លោះ។

ភាគីម្ខាងៗដែលមាននិន្នាការនយោបាយមិនស្របគ្នា បានយករូបគាត់ប្រើជាមធ្យោបាយបង្ហាញពីភាពផ្ទុយគ្នាយ៉ាងឆាប់រហ័ស ដោយការអះអាងត្រូវបានធ្វើឲ្យត្រូវនឹងសាច់រឿង។ សម្រាប់អ្នកគាំទ្រលោក Fico ដែលបានសរសេរនៅគេហទំព័របណ្ដាញសង្គមក្នុងសប្តាហ៍នេះ បានលើកឡើងថា ជនសង្ស័យ គឺជាអ្នកផ្ទុកមេរោគសេរីនិយម ដែលត្រូវតែលុបបំបាត់។ ចំណែកអ្នករិះគន់នាយករដ្ឋមន្ត្រី បានលាបពណ៌គាត់ថា ជាពួកស្តាំជ្រុលនិយម៕