ភ្នំពេញ ៖ ខណៈពិព័រណ៍ការងារ និងសន្និសីទវិទ្យាសាស្រ្ត លើកទី៣ បានកំពុងរៀបចំនៅវិទ្យាស្ថានជាតិពហុបច្ចេកទេសកម្ពុជា (NPIC) បានមើលឃើញថា យុវជនជាច្រើននាក់បាននាំគ្នាចូលរួមទស្សនាស្វែងយល់អំពីទីផ្សារការងារ និងបានដាក់ពាក្យស្វែងរកការងារភ្លាមៗទៅតាមជំនាញរៀងៗប្រកបដោយភាពសប្បាយរីករាយ។

​កញ្ញា សុខ បញ្ញា ជានិស្សិតឆ្នាំទី២ ជំនាញផ្នែកអគ្គិសនី បានឲ្យព័ត៌មាន ប៊ីធីវី ដឹងថា នេះជាលើកទី១ ដែលកញ្ញាបានចូលរួមក្នុងកម្មវិធីថ្ងៃនេះ និងមានអារម្មណ៍ថាប្លែក សប្បាយចិត្ត។ កញ្ញា បាននិយាយទៀតថា កម្មវិធីនេះដែរ ពិតជាផ្តល់សារសំខាន់សម្រាប់សិស្សនិស្សិត ដែលកំពុងស្វែងរកការងារធ្វើ ដើម្បីបានដាក់ពាក្យភ្លាម សម្ភាសន៍ជាមួយក្រុមហ៊ុនជាច្រើននៅទីនេះ។

 តំណាងឲ្យយុវជនដទៃផ្សេងទៀត លោក លីម ដារ៉ារិទ្ធ និស្សិតឆ្នាំទី២ដូចគ្នា ជំនាញផ្នែកវិទ្យាសាស្រ្តកុំព្យូទ័រ បានឲ្យដឹងថា ពួកគាត់ពិតជាពេញចិត្តជាខ្លាំងជាមួយនឹងកម្មវិធីខាងលើនេះ ព្រោះបានឃើញរូបភាពថ្មីៗ ថែមទាំងបានស្វែងយល់អំពីឱកាសការងារជាច្រើនផ្សេងៗទៀត ដែលអាចជ្រើសរើសបានទៅតាមជំនាញ និងចំណង់ចំណូលចិត្ត ដោយសារទីផ្សារការងារបច្ចុប្បន្នមានភាពទូលំទូលាយច្រើន។

នៅក្នុងពិធីបើកពិព័រណ៍ការងារ និងសន្និសីទវិទ្យាសាស្រ្ត លើកទី៣ ឯកឧត្តម ប៉ុក ប៉ាន់ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា កម្មវិធីនេះមិនត្រឹមតែជាការបង្កឱកាសឱ្យសិស្ស និស្សិត និងក្រុមហ៊ុនបានជួបគ្នាដោយផ្ទាល់ដើម្បីសិក្សាស្វែងយល់អំពីផលិតផល សេវាកម្ម បច្ចេកទេស បច្ចេកវិទ្យាថ្មីៗ ឱកាសកម្មសិក្សា ឱកាសការងារនោះទេ តែកម្មវិធីននេះ ក៏បើកឱកាសជូនដល់ក្រុមហ៊ុន ដៃគូអភិវឌ្ឍន៍ និងសាធារណជនបានស្វែងយល់អំពីការអប់រំបណ្តុះបណ្តាលបច្ចេកទេស និងវិជ្ជាជីវៈ ក៏ដូចស្នាដៃសិក្សាស្រាវជ្រាវអំពីបច្ចេកទេស និងបច្ចេកវិទ្យាផងដែរ។

 សូមបញ្ជាក់ថា កម្មវិធីពិព័រណ៍ការងារ និងសន្និសីទវិទ្យាសាស្រ្តលើកទី ៣ ឆ្នាំ២០២៤ មានរយៈពេល២ថ្ងៃ ចាប់ពីថ្ងៃទី១៦ និង១៧ ខែឧសភានេះ ដែលសហការរៀបចំដោយវិទ្យាស្ថានជាតិពហុបច្ចេកទេសកម្ពុជា និងទីភ្នាក់ងារជាតិមុខរបរ និងការងារ។ បើតាមរបាយការណ៍របស់វិទ្យាស្ថាន ពិធីនេះ គឺជាព្រឹត្តិការណ៍ធំមួយដែលរួមបញ្ចូលនូវកម្មវិធីចំនួន៣ ដែលមានអ្នកចូលរួមក្នុងកម្មវិធីនេះទាំង២ថ្ងៃសរុបប្រមាណ ៦,០០០នាក់ ដែលកម្មវិធីទាំង៣ រួមមាន៖ ១.ពិព័រណ៍ការងារដែលជាកិច្ចសរវាងវិទ្យាស្ថានជាតិពហុបច្ចេកទេសកម្ពុជា ទីភ្នាក់ងារជាតិមុខរបរ និងការងារ និងក្រុមហ៊ុន សហគ្រាសធំៗចំនួន៧២ ដែលចូលរួមដាក់តាំងបង្ហាញនូវផលិតផល សេវា បច្ចេកវិទ្យា-ល-។ ២. សន្និសីទវិទ្យាសាស្រ្តលើកទី៣ ស្តីពី “វិទ្យាសាស្រ្ត វិស្វកម្ម និងបច្ចេកវិទ្យាបៃតង” ដែលមានការចូលរួមពីលោកបណ្ឌិត សស្ត្រាចារ្យ និងនិស្សិតផ្នែកបច្ចេកទេស និងវិស្វកម្មដនានា និង៣.ខួបលើកទី១៩ នៃការបង្កើតវិទ្យាស្ថានជាតិពហុបច្ចេកទេសកម្ពុជា៕ 

អត្ថបទ ៖ ឈិត បូរ៉ាវី