អ៊ុយក្រែនកំពុងប្រញប់ប្រញាល់ផលិតសព្វាវុធបន្ថែមទៀត នៅក្នុងស្រុក ខណៈកងទ័ពរបស់ខ្លួន ប្រឈមនឹងការខ្វះខាតគ្រឿងយុទ្ធោបរណ៍ នៅសមរភូមិជួរមុខ។

វានឹងចំណាយទឹកប្រាក់រហូតដល់ ៦ពាន់លានដុល្លារអាមេរិកលើការផលិតអាវុធ នៅឆ្នាំនេះ ដើម្បីបំពេញតម្រូវការបន្ទាន់ បន្ទាប់ពីជំនួយយោធាលោកខាងលិច ត្រូវបានពន្យារពេលយ៉ាងយូរ។ គោលដៅផលិតអាវុធយ៉ាងតក់ក្រហល់នេះ កើតឡើង ក្នុងខណៈពេលដែលការពង្រីកលើការចំណាយផ្នែកវិស័យការពារជាតិ បានធ្វើឲ្យរុស្ស៊ីមានប្រៀបនៅសមរភូមិ ដោយកងកម្លាំងរបស់ខ្លួននៅតែបន្តរុលទៅមុខ នៅភាគឦសាន។

ដូច្នេះ អ៊ុយក្រែនគ្មានជម្រើសអ្វីក្រៅពីផលិតអាវុធបន្ថែមទៀត ហើយឲ្យបានលឿនជាងពេលមុនៗនោះទេ ដោយរោងចក្រធំៗ និងសូម្បីតែលំនៅឋាន ក៏ត្រូវបានប្រើប្រាស់ជាមជ្ឈមណ្ឌលឧស្សាហកម្មយោធាដែលកំពុងត្រូវបានពង្រីកយ៉ាងឆាប់រហ័សរបស់ប្រទេសផងដែរ។

តែយ៉ាងណាក្ដី បណ្ដាអ្នកសង្កេតការណ៍ បាននិយាយថា ការផលិតសព្វាវុធ ក្នុងសម័យសង្រ្គាមបែបនេះ គឺជាអាជីវកម្មដ៏ប្រថុយប្រថានមួយ ដោយពួកគេបន្ថែមថា ការពង្រីកការផលិតក៏នាំមកនូវការគំរាមកំហែងកាន់តែខ្លាំងនៃការវាយប្រហារផងដែរ។ គ្រឿងបរិក្ខារ សម្រាប់ផលិតអាវុធ ជារឿយៗជាគោលដៅនៃការបាញ់ផ្លោងរបស់រុស្ស៊ី ហើយជំហាននីមួយៗនៃដំណើរការដំឡើង ត្រូវធ្វើឡើងនៅទីតាំងផ្សេងៗគ្នា៕