ស្វាយរៀង ៖ នៅចថ្ងៃទី១៧ ខែឧសភានេះ ក្លិបបាល់ទាត់ព្រះខ័នរាជស្វាយរៀង បានរៀបចំពិធីដង្ហែពានទាំងពីរ ដែលក្រុមខ្លួនទើបគ្រងជើងឯកទាំងពីរ ក្នុងមួយរដូវកាល រួមមានពានរង្វាន់ Cambodian Premier League និងពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១៧ ឆ្នាំ២០២៣/២៤ ដោយមានប្រជាពលរដ្ឋ សិស្សានុសិស្ស និងយុវជនយ៉ាងច្រើនកុះករ បានចូលរួមដង្ហែ និងអបរសាទរជាមួយសមិទ្ធផលជាប្រវត្តិសាស្ដ្ររបស់ក្លិបឆ្នាំនេះ ។

ផ្ដើមក្បួនដង្ហែចេញពីកីឡដ្ឋានស្វាយរៀង នាម៉ោង ៣រសៀល ដោយដង្ហែឆ្លងកាត់ទីតាំងសម្ងាន់ៗ ជាច្រើន ក្នុងក្រុង មុនបញ្ចប់នៅទីចុងក្រោយ វិមានឯករាជ្យក្រុងស្វាយរៀង គេឃើញមានអ្នកគាំទ្រយ៉ាងច្រើនបានចូលរួមដង្ហែតាំងពីកន្លែងចាប់ផ្ដើម រហូតដល់ទីតាំងបញ្ចប់ ហើយគ្រប់ផ្លូវនីមួយៗ ក៏មានប្រជាពលរដ្ឋចេញមកសាទរយ៉ាងឈូឆរផងដែរ ដែលបង្កឲ្យបរិយាកាសកាន់តែអធិកអធមថែមទៀត ក្នុងកម្មវិធីដង្ហែពានរង្វាន់សម្ដេចតេចោ ហ៊ុន សែន និងលីគកំពូលកម្ពុជា ឆ្នាំ២០២៣/២៤ របស់ក្លិបព្រះខ័នរាជស្វាយរៀងនេះ ។

ទន្ទឹមជាមួយការដង្ហែពានពីរ ក្នុងមួយរដូវកាលនេះដែរ ក្រៅពីអញ្ជើញប្រជាពលរដ្ឋ ពិសេសអ្នកគាំទ្រក្លិបព្រះខ័នរាជស្វាយរៀង គ្រប់មជ្ឈដ្ឋានចូលរួម ក្លិបក៏មាននូវកម្មវិធីថតរូបអនុស្សាវរីយ៍ជាមួយពាន ការចុះហត្ថលេខាផ្ទាល់ពីកីឡាករ ក៏ដូចជាកម្មវិធីកម្សាន្ដជាច្រើនទៀត ដើម្បីឈ្នះរង្វាន់អនុស្សាវរីយ៍ពីកម្មវិធី ។ អ្វីដែលពិសេសទៀតនោះ ក្លិបក៏បានរៀបចំនូវការប្រគុំតន្រ្តីដ៏ធំ ដោយមានការចូលរួមសម្តែងពីសំណាក់តារាចម្រៀងល្បីៗប្រចាំប្រទេស ដូចជាលោក G-Devith លោក នីកូ ពូឃ្លាំង និងកញ្ញា កាម៉ុនរ័ត្ន ដើម្បីបង្កភាពសប្បាយរីករាយជូនអ្នកគាំទ្ររបស់ខ្លួនផងដែរ ។

គួរដឹងថា ព្រះខ័នរាជស្វាយរៀង គឺជាក្លិបដំបូង ក្នុងរយៈពេល ១៦ឆ្នាំចុងក្រោយ ដែលបានគ្រងជើងឯកពាន ២ ក្នុងមួយរដូវកាល ទាំងលីគកំពូលកម្ពុជា និងពានរង្វាន់សម្ដេចតេជោ ហ៊ុន សែន ឆ្នាំ២០២៣/២៤ បន្ទាប់ពីក្លិបភ្នំពេញក្រោន ដែលធ្លាប់ធ្វើបានកំណត់ត្រានេះ កាលពីឆ្នាំ២០០៨ ។ ជ័យជម្នះនេះ បានធ្វើឲ្យអ្នកគាំទ្រមានការសាទរ និងភ្ញាក់ផ្អើលជាខ្លាំង ចំពោះការធ្វើបានយ៉ាងល្អរបស់ក្លិបមានមូលដ្ឋាននៅខេត្ដស្វាយរៀងនេះ ហើយក៏សង្ឃឹមថា ព្រះខ័នរាជស្វាយរៀង នឹងបន្ដធ្វើបានកាន់តែល្អនារដូវកាលថ្មី ពិសេសការត្រៀមចូលរួមប្រកួតជើងឯកក្លិបអាស៊ីអាគ្នេយ៍ AFF Club Championship និងជើងឯកក្លិបបាល់ទាត់អាស៊ី AFC Challenge League សម្រាប់រដូវកាលឆ្នាំ២០២៤/២៥ តែម្ដង ៕

អត្ថបទ លី ឈុនឡា