រដ្ឋមន្ត្រីការបរទេសអាល្លឺម៉ង់ បាននិយាយនៅថ្ងៃសុក្រនេះថា ប្រទេសអ៊ុយក្រែន ត្រូវការអាវុធរយៈចម្ងាយឆ្ងាយបន្ថែមទៀត ដើម្បីប្រយុទ្ធប្រឆាំងនឹងការរុលចូលទៅមុខរបស់រុស្ស៊ី នៅក្នុងតំបន់ខាគីវភាគខាងជើង ជាកន្លែងដែលស្ថានភាពនៅជុំវិញទីក្រុងធំទី២របស់ប្រទេសនេះ នៅតែមាន«ភាពតានតឹងខ្លាំង»។

កងកម្លាំងរុស្ស៊ី បានធ្វើផ្លូវចូលយ៉ាងតិចជាច្រើនគីឡូម៉ែត្រក្នុងតំបន់ក្នុងរយៈពេលប៉ុន្មានថ្ងៃថ្មីៗនេះ ដោយបង្ខំឲ្យកងទ័ពដែលលើសចំណុះរបស់ទីក្រុងគីវ ព្យាយាមគ្រប់គ្រងនៅខ្សែត្រៀមជួរមុខ ខណៈដែលទីក្រុងមូស្គូ បង្កើនសម្ពាធបន្ថែមទៀតលើផ្នែកខាងមុខនៅភាគខាងកើត។

លោកស្រី អានណាឡេណា បែបក់ (Annalena Baerbock) បាននិយាយនៅក្រៅកិច្ចប្រជុំរដ្ឋមន្ត្រីការបរទេសនៅទីក្រុង Strasbourg ថា វាជារឿងសំខាន់ក្នុងការកាត់ផ្តាច់ផ្លូវផ្គត់ផ្គង់របស់រុស្ស៊ី និងផ្តល់ឲ្យអ៊ុយក្រែននូវសព្វាវុធ «ដែលអាចប្រើប្រាស់បានក្នុងរយៈចម្ងាយមធ្យម និងចម្ងាយឆ្ងាយ»។

លោកស្រី បានបន្ថែមថា៖«យើងក៏កំពុងធ្វើការជាមួយដៃគូផ្សេងទៀតលើបញ្ហានេះ»។ «សរុបមក វាជាស្ថានភាពដ៏លំបាកខ្លាំងបំផុត»។

អាល្លឺម៉ង់ បានក្លាយជាប្រទេសផ្គត់ផ្គង់អាវុធធំទី២ របស់អ៊ុយក្រែន ចាប់តាំងពីការឈ្លានពានរបស់រុស្ស៊ីក្នុងឆ្នាំ ២០២២ ប៉ុន្តែរហូតមកដល់ពេលនេះ លោកអធិការបតី អូឡាហ្វ សូល ( Olaf Scholz) បានស្តីបន្ទោសចំពោះការបំពាក់ទីក្រុងគីវជាមួយនឹងមីស៊ីល Taurus រយៈចម្ងាយឆ្ងាយ។