ជម្លោះនៅតំបន់ហ្គាហ្សាស្ទ្រីប រវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីនដឹកនាំដោយហាម៉ាស បាននិងកំពុងបន្តឡើងកម្ដៅបើរាប់ចាប់តាំងពីថ្ងៃទី០៧ ខែតុលា ឆ្នាំ២០២៣ ដែលមានរយៈពេលជាងប្រាំមួយខែមកហើយ។ ទោះជាយ៉ាងណាក៏ដោយ ដំណោះស្រាយ និងបទឈប់បាញ់គ្នាភ្លាមៗ ហាក់បីដូចជាមិនបានដាក់នៅលើតុចចារនោះឡើយ ដោយសារតែអ្នកដែលគាំទ្រពីក្រោយមិនបានស្វែងរកដំណោះស្រាយជាក់ស្ដែងណាមួយនោះឡើយ ហើយភាគីជម្លោះក៏មិនទាន់ចូលពិភាក្សាស៊ីជម្រៅដើម្បីស្វែងរកដំណោះស្រាយត្រឹមត្រូវនៅឡើយទេ។ ជម្លោះនេះអាចនឹងបន្ត ឬកើតមានឡើងជារៀងរហូតដោយសារតែយើងមិនអាចមើលឃើញសញ្ញាណណាមួយថាក្រុមហាម៉ាសបានចុះអន់ថយ និងអាចសុំបញ្ចប់នោះឡើយ ដែលធ្វើឲ្យអ៊ីស្រាអែលគ្មានជម្រើសអ្វីក្រៅពីបន្តការប្រយុទ្ធរបស់ខ្លួននោះឡើយ។ ជនស្លូតត្រង់ និងជនងាយរងគ្រោះពិតប្រាកដ គឺជាពលរដ្ឋនៃភាគីទាំងពីរ។ គិតត្រឹមថ្ងៃទី០៦ ខែឧសភា ឆ្នាំ ២០២៤ នេះ មានមនុស្សប្រមាណ 600,0000 នាក់បានភៀសខ្លួនទៅកាន់ទីក្រុងហ្គាហ្សាភាគខាងត្បូង នេះបើយោងតាមទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន។ មានអ្នកការទូតជាច្រើនរួមទាំងលោក Josep Borrell ដែលជាអ្នកការទូតល្បីឈ្មោះមួយរូបរបស់សហភាពអឺរ៉ុប បានជំរុញឱ្យអ៊ីស្រាអែលបញ្ចប់ប្រតិបត្តិការនៅ Rafah ជាបន្ទាន់។ លោកក៏បានសង្កត់ធ្ងន់ថា ប្រសិនបើអ៊ីស្រាអែលបន្តប្រតិបត្តិការយោធានៅ Rafah វានឹងប៉ះពាល់យ៉ាងខ្លាំងដល់ទំនាក់ទំនងរវាងសហភាពអឺរ៉ុប និងអ៊ីស្រាអែល។

ប្រជាជនប៉ាឡេស្ទីនជាង 1.5 លាននាក់បានផ្លាស់ទីលំនៅបានស្វែងរកទីជម្រកនៅក្នុងទីក្រុង Rafah ភាគខាងត្បូងបំផុត បន្ទាប់ពីពួកគេត្រូវបានបង្ខំឱ្យភៀសខ្លួនចេញពីផ្ទះរបស់ពួកគេនៅក្នុងតំបន់ផ្សេងទៀតនៃតំបន់ហ្គាស្សា ដែលស្ថិតនៅក្រោមការទម្លាក់គ្រាប់បែកដ៏ខ្លាំងក្លារបស់អ៊ីស្រាអែលចាប់តាំងពីខែតុលា ឆ្នាំ២០២៣ មក។ អ្នកនាំពាក្យរបស់អង្គការសហប្រជាជាតិ លោក Stephane Dujarric បានលើកឡើងថា «ជនស៊ីវិលត្រូវតែត្រូវបានគោរព និងការពារគ្រប់ពេលវេលា នៅ Rafah និងកន្លែងផ្សេងទៀតនៅក្នុងតំបន់ហ្គាស្សា។ សម្រាប់ប្រជាជននៅហ្គាហ្សា ពេលនេះគ្មានកន្លែងណាមានសុវត្ថិភាពទេ»។

ទោះបីជាមានការរិះគន់ជាច្រើន និងការជំរុញឱ្យមានបទឈប់បាញ់ជាបន្ទាន់ពីមេដឹកនាំ និងអ្នកការទូតជាច្រើនក៏ដោយ វាហាក់ដូចជាមិនមានការជិះឥទ្ធិពលអ្វីដល់ការវិវត្តនៃជម្លោះនាពេលថ្មីៗនេះទេ។ គេជឿថា ដរាបណាអ៊ីស្រាអែលនៅតែទទួលបានការគាំទ្រពីសម្ព័ន្ធមិត្តរបស់គេ វាគ្មានផ្លូវណាដែលជម្លោះនេះឈានដល់ការបញ្ចប់នោះឡើយ។ កាលពីសប្តាហ៍មុន រដ្ឋបាលលោក Joe Biden បានផ្អាកការបញ្ជូនអាវុធរាប់ពាន់គ្រាប់ទៅកាន់ប្រទេសអ៊ីស្រាអែល រួមទាំងគ្រាប់បែកទម្ងន់ 2,000 ផោន ចំពេលមានការព្រួយបារម្ភអំពីផែនការរបស់អ៊ីស្រាអែលក្នុងការបើកប្រតិបត្តិការជើងគោកដ៏ធំមួយនៅ Rafah ។ ក្រោយមក នៅថ្ងៃអង្គារ សេតវិមានបានហៅសេចក្តីព្រាងច្បាប់នេះថាជា "ប្រតិកម្មខុសឆ្គងចំពោះការបង្ខូចទ្រង់ទ្រាយដោយចេតនានៃវិធីសាស្រ្តរបស់រដ្ឋបាលចំពោះអ៊ីស្រាអែល"។ គេបានលើកឡើងថាទង្វើនេះជាការប៉ុនប៉ងមួយដើម្បី "រារាំងសមត្ថភាពរបស់ប្រធានាធិបតីក្នុងការដាក់ពង្រាយជំនួយសន្តិសុខរបស់សហរដ្ឋអាមេរិកស្របតាមគោលនយោបាយការបរទេសរបស់សហរដ្ឋអាមេរិក និងគោលបំណងសន្តិសុខជាតិ"។ គេបានសង្កត់ធ្ងន់ថាការប្តេជ្ញាចិត្តរបស់រដ្ឋបាលលោក Biden ចំពោះអ៊ីស្រាអែលគឺ " ironclad - ដែកថែប" ហើយសហរដ្ឋអាមេរិកនឹងបន្តប្រើប្រាស់មូលនិធិទាំងអស់ដែលសមរម្យសម្រាប់អ៊ីស្រាអែល "ស្របតាមតម្រូវការច្បាប់" ។

តំបន់ Rafah

លើសពីនេះ លេខាធិការ លោក Austin បានសង្កត់ធ្ងន់ក្នុងអំឡុងពេលបង្ហាញមុខអនុគណៈកម្មាធិការព្រឹទ្ធសភាថា ការផ្អាកការដឹកជញ្ជូនអាវុធនឹងមិនប៉ះពាល់ដល់ប្រាក់ 26 ពាន់លានដុល្លារជាជំនួយបន្ថែមដល់អ៊ីស្រាអែល ដែលសភាអាមេរិកបានអនុម័តកាលពីខែមេសានោះទេ។ នេះជាផ្នែកមួយ នៃប្រាក់រាប់ពាន់លានដុល្លារដែលបានផ្តល់ជារៀងរាល់ឆ្នាំដល់អ៊ីស្រាអែលដោយសហរដ្ឋអាមេរិក ដែលភាគច្រើននៃប្រាក់នោះ ក្រុមប្រឹក្សាទំនាក់ទំនងបរទេស "ត្រូវបានផ្តល់ជាជំនួយក្រោមកម្មវិធីហិរញ្ញប្បទានយោធាបរទេស (FMF) ដែលជាមូលនិធិដែលអ៊ីស្រាអែលត្រូវតែប្រើប្រាស់ដើម្បីទិញឧបករណ៍ និងសេវាកម្មយោធារបស់សហរដ្ឋអាមេរិក»។

យោងតាមគោលនយោបាយផ្ទេរសព្វាវុធរបស់សហរដ្ឋអាមេរិក រដ្ឋាភិបាលសហរដ្ឋអាមេរិកមានកាតព្វកិច្ច “ទប់ស្កាត់ … ការផ្ទេរអាវុធដែលហានិភ័យដែលសម្របសម្រួល ឬរួមចំណែកដល់ការរំលោភសិទ្ធិមនុស្ស ឬច្បាប់មនុស្សធម៌អន្តរជាតិ”។ ហើយតើគោលនយោបាយការបរទេសរបស់អាមេរិកខ្លួនឯងនឹងទៅជាយ៉ាងណា ទើបសង្កេតមិនឃើញថាខ្លួនកំពុងតែបំពាន?

គួររំលឹកផងដែរថា ចាប់តាំងពីយោធាអ៊ីស្រាអែលបានបើកការវាយប្រហារយោធាលើក្រុមហាម៉ាស់ដោយមានការគាំទ្រយ៉ាងរឹងមាំពីសហរដ្ឋអាមេរិកក្នុងនាមអ្នកសងសឹកជូនប្រជាជនស្លូតត្រង់ និងការការពារខ្លួន ប្រជាជនប៉ាឡេស្ទីន 35,000 នាក់នៅតំបន់ហ្គាហ្សាស្ទ្រីបត្រូវបានសម្លាប់ ហើយហេដ្ឋារចនាសម្ព័ន្ធត្រូវបានបំផ្លាញស្ទើរតែទាំងស្រុងផងដែរ។