កោះកុង៖ សម្តេចពិជ័យសេនា ទៀ បាញ់ ប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តកោះកុង បានអញ្ជើញជួបសំណេះសំណាលអង្គបោះឆ្នោត និងសមាជិក សមាជិកាគណបក្សជាង១ពាន់ ដោយបើកយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្តក្រុងស្រុក។

ថ្លែងទៅកាន់អង្គបោះឆ្នោត និងសមាជិកសមាជិកគណបក្សប្រជាជនកម្ពុជាខេត្តកោះកុង សម្តេចពិជ័យសេនា ទៀ បាញ់ លើកឡើងនៅទី១៧ ខែឧសភា ឆ្នាំ២០២៤ថា ថ្ងៃនេះជាថ្ងៃដំបូងនៃយុទ្ធនាការឃោសនាបោះឆ្នោត ដែលមានការជួបជុំបេក្ខជនក្រុមប្រឹក្សាខេត្ត ទាំងពេញសិទ្ធិ និងបម្រុង រួមជាមួយគណៈកម្មាធិការគណបក្ស និងសមាជិកគណបក្សពីខេត្ត ក្រុង ស្រុកឃុំសង្កាត់ និងមន្ទីរអង្គភាពនានាជុំវិញខេត្តជាង១ពាន់នាក់ ដើម្បីបញ្ជាក់អំពីឆន្ទៈ នៃការប្ដេជ្ញាចូលរួមការបោះឆ្នោត ស្របតាមបទប្បញ្ញត្តិ នីតិវិធី និងច្បាប់នៃការបោះឆ្នោត ព្រមទាំងជាការដំណើរការសកម្មភាពរបស់ក្រុមបេក្ខជនក្រុមប្រឹក្សាខេត្ត ក្រុង ស្រុក រួមជាមួយក្រុមការងារ និងគណបក្សនៅមូលដ្ឋាន។

សម្តេចពិជ័យសេនា គូសបញ្ជាក់ដែរថា ការបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤នេះ គឺជាព្រឹត្តិការណ៍ប្រវត្តិសាស្ត្រថ្មីមួយទៀតរបស់ប្រទេសកម្ពុជា ក្នុងដំណើរការអនុវត្តលទ្ធិប្រជាធិបតេយ្យ សេរីពហុបក្ស បន្ទាប់ពីកម្ពុជាទើបបានទទួលជោគជ័យ ក្នុងការបោះឆ្នោតព្រឹទ្ធសភា នីតិកាលទី៥ កាលពីថ្ងៃទី២៥ ខែកុម្ភៈ ឆ្នាំ២០២៤កន្លងទៅ ស្របតាមរដ្ឋធម្មនុញ្ញកម្ពុជា ក្នុងបរិយាកាសនយោបាយប្រកបដោយលក្ខណៈសេរី ត្រឹមត្រូវ និងយុត្តិធម៌។

សម្តេចពិជ័យសេនា ទៀ បាញ់ ក៏បានរំលេចថា ទោះបីជាការបោះឆ្នោតជ្រើសរើសក្រុមប្រឹក្សាខេត្តក្រុងស្រុក ជាការបោះឆ្នោតអសកល និងមិនផ្ទាល់ក៏ពិតមែន តែគណបក្សប្រជាជនកម្ពុជាបានយកចិត្តទុកដាក់រៀបចំគ្រប់ស្ថានការណ៍យ៉ាងម៉ឺងម៉ាត់បំផុតពីចម្ងាយ និងចាត់ចែងអនុវត្តដោយមានផែនការសកម្ម តាមដានត្រួតពិនិត្យ និងវាយតម្លៃតាមដំណាក់កាលនានានៃការបោះឆ្នោត ព្រមទាំងពង្រឹងការប្តេជ្ញាចិត្តរួមគ្នាក្រុមការងារគណបក្សគ្រប់ជាន់ថ្នាក់ បេក្ខជនឈរឈ្នោះ និងអង្គបោះឆ្នោត។

បន្ថែមលើនេះសម្ដេចបានផ្តាំផ្ញើដល់អង្គបោះឆ្នោត សូមមេត្តាថែរក្សាវត្តមាន ថែរក្សាសុខភាព និងអារម្មណ៍ត្រូវពិនិត្យឯកសារបោះឆ្នោត និងតាមដានប្រតិទិនបោះឆ្នោតជាប់ជាប្រចាំ និងគោរពខ្ជាប់ខ្ជួនតាមបទបញ្ជា បំរាម និងបទបញ្ញត្តិនានា ក្នុងស្មារតីធ្វើយ៉ាងណារក្សាឲ្យបានសម្លេង ១០០ភាគរយ ដូចលទ្ធផល បោះឆ្នោតជ្រើសតាំងសមាជិកព្រឹទ្ធសភា នាពេលកន្លងទៅ។

យោងតាមការថ្លែងការណ៍របស់លោកជំទាវ មិថុនា ភូថង ប្រធានគណបក្សប្រជាជនកម្ពុជាខេត្តកោះកុង បង្ហាញថា យុទ្ធនាការបោះឆ្នោតជ្រើសរើសក្រុមប្រឹក្សារាជធានីខេត្ត ក្រុងស្រុក អាណត្តិទី៤ ក្រុមការងារត្រូវផ្សព្វផ្សាយប្រវត្ថិស្នាដៃ និងសមិទ្ធផលរជាប្រវត្ថិសាស្រ្តរបស់គណបក្ស។គោលដៅជាយុទ្ធសាស្រ្តរបស់គណបក្ស ។ គោលការណ៍ជាមូលដ្ឋានសម្រាប់ការអភិវឌ្ឍន៍ឃុំសង្កាត់ និងគណបក្សប្រជាជនកម្ពុជាបន្តការពារ និងលើកស្ទួយផលប្រយោជន៍របស់ពលរដ្ឋ។

លោកជំទាវ មិថុនា ភូថង វាយតម្លៃដែរថា ស្ថានការណ៍នយោបាយក្នុងមូលដ្ឋានមានភាពរលូនល្អ ពុំមានបញ្ហាអ្វីកើតឡើងគួរឱ្យកត់សម្គាល់ឡើយ។ ដោយឡែកសុខភាពរបស់អង្គបោះឆ្នោតទាំង១៤៥នាក់វិញ គឺមានលក្ខណៈប្រក្រតីពុំមានអ្វីធំដុំដែលជៈឥទ្ធិពលដល់ការចូលរួមបោះឆ្នោតនៅថ្ងៃទី២៦ ខែឧសភា ខាងមុខនោះទេ៕ អត្តបទ៖ ឈឹម មករា