កងកម្លាំងអ៊ីស្រាអែល បានប្រយុទ្ធជាមួយក្រុមអ្នកប្រយុទ្ធហាម៉ាស នៅតាមច្រកផ្លូវតូចនៅទីក្រុង Jabalia ភាគខាងជើងតំបន់ហ្កាហ្សាកាលពីថ្ងៃសុក្រ ក្នុងការប្រយុទ្ធគ្នាយ៉ាងខ្លាំង ចាប់តាំងពីទាហានអ៊ីស្រាអែល បានត្រឡប់ទៅកាន់តំបន់នោះ មួយសប្តាហ៍កន្លងទៅនេះ ខណៈក្រុមសកម្មប្រយុទ្ធនៅភាគខាងត្បូង បានវាយប្រហាររថក្រោះដែលត្រូវបានដាក់ពង្រាយនៅជុំវិញទីក្រុង Rafah ។

ប្រជាជន និយាយថា រថពាសដែករបស់អ៊ីស្រាអែល បានវាយរុលចូលរហូតដល់ផ្សារមួយកន្លែង នៅទីក្រុង Jabalia ជាជំរំជនភៀសខ្លួនធំបំផុតចំនួន៨កន្លែងរបស់តំបន់ហ្កាហ្សា ហើយគ្រឿងចក្រឈូសឆាយ កំពុងវាយកម្ទេចលំនៅឋាន និងហាងនានានៅតាមផ្លូវ។ 

លោក ជេន ឡាអឺក(Jens Laerke) អ្នកនាំពាក្យការិយាល័យមនុស្សធម៌របស់អង្គការសហប្រជាជាតិ បាននិយាយនៅទីក្រុងហ្សឺណែវថា ប្រជាជនមានការភ័យខ្លាច ហើយពួកគេកំពុងព្យាយាមចាកចេញ ដែលពួកគេភាគច្រើន កំពុងធ្វើតាមបញ្ជាឱ្យភៀសខ្លួនទៅភាគខាងជើងទៅកាន់ឆ្នេរសមុទ្រ ប៉ុន្តែវាពុំមានផ្លូវ ឬគោលដៅសុវត្ថិភាពនោះទេ។ ខណៈការប្រយុទ្ធគ្នាកាន់តែក្តៅគគុក យោធាអាមេរិក បាននិយាយថា រថយន្តដឹកជំនួយ បានចាប់ផ្តើមដំណើរការចេញពីកំពង់ផែបណ្តោះអាសន្នសាងសង់នៅឆ្នេរសមុទ្រ ជាលើកដំបូងដែលបានទៅដល់តំបន់ហ៊ុមព័ទ្ធហ្កាហ្សា។

អ្នកនាំពាក្យរងរបស់អង្គការសហប្រជាជាតិ លោក Farhan Haq បាននិយាយថា ដើម្បីទប់ស្កាត់ គ្រោះទុរ្ភិក្ស យើងត្រូវតែប្រើផ្លូវលឿនបំផុត និងច្បាស់បំផុតដើម្បីបានទៅដល់ប្រជាជននៅតំបន់ហ្កាហ្សា។

សេតវិមាន បាននិយាយថា ជំនួយបន្ថែមពីសហរដ្ឋអាមេរិក បានទៅដល់ប្រទេសស៊ីប ដើម្បីដាក់លើនាវាសម្រាប់ដឹកជញ្ជូនទៅកាន់តំបន់ហ្កាហ្សាតាមរយៈផែថ្មី។ អ្នកនាំពាក្យសន្តិសុខជាតិ របស់សេតវិមានលោក John Kirby បានប្រាប់អ្នកសារព័ត៌មានថា សហរដ្ឋអាមេរិក មានផែនការសន្តិសុខដ៏រឹងមាំ ដើម្បីការពារបុគ្គលិកដែលពាក់ព័ន្ធទៅនឹងប្រតិបត្តិការនៅកំពង់ផែ ហើយទាហានអាមេរិកមួយចំនួន បានចូលរួមក្នុងការជួយសម្រួលជំនួយពី នាវាទៅកាន់កំពង់ផែ និង សម្រាប់គោលបំណងសន្តិសុខ។