ភ្នំពេញ: ចាប់ពីថ្ងៃទី១៦-១៧ ខែឧសភា ឆ្នាំ២០២៤ កាកបាទក្រហមកម្ពុជាទីស្នាក់ការកណ្តាល បានបើកវគ្គផ្សព្វផ្សាយតាមប្រព័ន្ធនិមិត្តស្តីអំពី “បរិយាប័ន្ន និងទប់ស្កាត់ការកេងប្រវ័ញ្ចផ្លូវភេទលើកុមារតាមអនឡាញ” ដែលមានការចូលរួមពីលោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា និងការចូលរួមធ្វើបទបង្ហាញអំពីបរិយាប័ន្នពិការភាព ដោយប្រធានកម្មវិធីអង្គការ PafiD ព្រមទាំងមានធ្វើបទបង្ហាញអំពីទប់ស្កាត់ការកេងប្រវ័ញ្ចផ្លូវភេទលើកុមារតាមអនឡាញ ដោយឯកឧត្តម ឧត្តមសេនីយ៍ឯក ជីវ ផល្លី រួមជាមួយមន្ត្រីទីស្នាក់ការកណ្តាល និងសាខាកាកបាទក្រហមកម្ពុជា ទាំង២៥ ប្រមាណជាង១២០នាក់។

ក្នុងឱកាសនេះ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បាននាំប្រសាសន៍ផ្តាំផ្ញើសួរសុខទុក្ខ និងថ្លែងអំណរគុណចំពោះ ថ្នាក់ដឹកនាំអង្គការ PafiD និងថ្នាក់ដឹកនាំនៃអគ្គស្នងការនគរបាលជាតិ ដែលតែងតែគាំទ្រ និងសហការជាមួយកាកបាទក្រហមកម្ពុជា ទាំងស្មារតី ថវិកា និងបច្ចេកទេស ដើម្បីចូលចំណែកជាមួយរាជរដ្ឋាភិបាល ដើម្បីបំបាត់ភាពរើសអើង ជាមួយជនមានពិការរភាព ផ្តល់ឱកាសការងារដល់ជនពិការ ការរំលោភបំពាន និងការទប់ស្កាត់ការកេងប្រវ័ញ្ចផ្លូវភេទលើកុមារ ទាំងការរំលោភបំពានដោយផ្ទាល់ ឬតាមអនឡាញ។

លោកជំទាវបានបន្តថា “វគ្គផ្សព្វផ្សាយនេះពិតជាមានសារៈសំខាន់ណាស់ និងបានផ្តល់ចំណេះដឹង និងបទពិសោធន៍ជូនមន្ដ្រីកាកបាទក្រហមកម្ពុជា ថ្នាក់កណ្ដាល និងមន្ត្រីសាខាឱ្យយល់ដឹងបន្ថែមទៀត ដើម្បីបំបាត់ការរើសអើងជាមួយជនមានពិការភាព និងចូលរួមកាត់បន្ថយហានិភ័យ នៃការប្រើប្រាស់អ៊ីនធឺណិតចំពោះកុមារ ក្មេងស្រី និងស្ត្រី។ លោកជំទាវអគ្គលេខាធិការ ក៏បានបញ្ជាក់ផងដែរថា កាកបាទក្រហមកម្ពុជា មានគោលនយោបាយការពារកុមារ ដែលតម្រូវឱ្យមន្រ្តីទាំងអស់ត្រូវចូលរួមការពារកុមារ និងផ្សព្វផ្សាយបន្ត ហើយផ្នែកពិការភាព ជាការងារអាទិភាព១ដែល កាកបាទក្រហមកម្ពុជា បានកំណត់ និងយកចិត្តទុកដាក់។ ដូចនេះ បន្ទាប់ពីបញ្ចប់វគ្គនេះ មន្រ្តីក្រុមប្រតិបត្តិសាខានឹងផ្សព្វផ្សាយបន្ត ជូនដល់យុវជន ស្ម័គ្រចិត្តកាកបាទក្រហមកម្ពុជា និងលើកផែនការផ្សព្វផ្សាយបន្តដូចភ្លៀងរលឹម”។

ជាថ្មីម្តងទៀង លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា សូមថ្លែងអំណរគុណចំពោះ ថ្នាក់ដឹកនាំនៃអគ្គស្នងការនគរបាលជាតិ ដែលតែងតែគាំទ្រ និងសហការជាមួយកាកបាទក្រហមកម្ពុជា ដើម្បីជួយដល់ប្រជាពលរដ្ឋដែលរងគ្រោះ និងងាយរងគ្រោះ និងសូមទទួលបាននូវពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕ អត្ថបទៈ សំ ងីម