ចំបាប់៖ សហព័ន្ធកីឡាចំបាប់កម្ពុជា បាននាំយកអតីតកីឡាករចំបាប់ជម្រើសជាតិអ៊ីរ៉ង់ និងជាម្ចាស់មេដាយមាសកីឡាអូឡាំពិកឆ្នាំ២០១២ នៅចក្រភពអង់គ្លេស លោក Komeil Ghasemi មកធ្វើជាគ្រូបង្វឹកក្រុមជម្រើសជាតិចំបាប់កម្ពុជា។ ការតែងតាំងគ្រូបង្វឹកថ្មីនេះគឺទទួលបានការឧបត្ថម្ភគាំទ្រ ពីគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC)។
លោក ធិន វិចិត្រ អគ្គលេខាធិការសហព័ន្ធបានបញ្ជាក់ថា សហព័ន្ធបានចុះកិច្ចសន្យារយៈពេល ១ឆ្នាំជាមួយលោក Komeil Ghasemi ប៉ុន្ដែរាល់ការចំណាយលើការស្នាក់នៅ និងប្រាក់ឧបត្ថម្ភប្រចាំគឺជាបន្ទុករបស់គណៈកម្មាធិការជាតិ CAMSOC បន្ទាប់ពីសហព័ន្ធបានធ្វើការស្នើសុំ និងទទួលបានការឯកភាពពីសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធាន CAMSOC កាលពីថ្មីៗ។ ជាមួយការនាំយកគ្រូបង្វឹកកម្រិតខ្ពស់ក្នុងបរិបទកូវីដ-១៩ នេះដែរ លោកថា មិនមានជាបញ្ហាចោតខ្លាំងនោះទេ ព្រោះក្នុងពេលឆាប់ៗខាងមុខសហព័ន្ធនឹងរៀបចំការប្រមូលផ្ដុំហ្វឹកហាត់ លក្ខណៈបិទទ្វារនៅពហុកីឡដ្ឋានជាតិមរតកតេជោ តាមគោលការណ៍របស់ថ្នាក់ដឹកនាំដើម្បីពង្រឹងសមត្ថភាព និងគុណផលកីឡាកម្រិតខ្ពស់ត្រៀមការប្រកួតអន្ដរជាតិនានា ពិសេសស៊ីហ្គេម ២លើកចុងក្រោយនៅវៀតណាម និងនៅកម្ពុជា។
លោក Komeil Ghasemi បានធ្វើដំណើរមកដល់កម្ពុជាជាង ២សប្ដាហ៍មកហើយ ខណៈក្រោយបញ្ចប់ការធ្វើចត្ដាឡីស័ករយៈពេល ១៤ថ្ងៃកាលពីថ្ងៃទី០៤ ខែសីហាម្សិលមិញ អនុប្រធានសហព័ន្ធលោក ខេស៊ី បាណេត បានសម្ដែងការស្វាគមន៍យ៉ាងកក់ក្ដៅ ចំពោះវត្តមានគ្រូបង្វឹកថ្មីរបស់ក្រុមជម្រើសជាតិកីឡាចំបាប់កម្ពុជា មុនចាប់ផ្ដើមធ្វើការងារជាមួយគ្នានាពេលឆាប់ៗខាងមុខ។ គួរដឹងថា មុនវិវត្តន៍ខ្លួនជាគ្រូបង្វឹក លោក Komeil Ghasemi គឺជាអតីតកីឡាករឆ្នើមអ៊ីរ៉ង់ដោយធ្លាប់ឈ្នះមេដាយមាសអូឡាំពិកទីក្រុងឡុងឆ្នាំ២០១២ លើប្រភេទទម្ងន់ ១២០គីឡូក្រាម និងឈ្នះមេដាយប្រាក់អូឡាំពិកទីក្រុងរីយ៉ូឆ្នាំ២០១៦ លើប្រភេទទម្ងន់ ១២៥គីឡូក្រាម។ លើសពីនេះ លោកក៏ធ្លាប់ឈ្នះមេដាយប្រាក់ពិភពលោកកាលពីឆ្នាំ២០១៤ និងឈ្នះមេដាយមាសជើងឯកទ្វីបអាស៊ីឆ្នាំ២០១៤ រួមទាំងឈ្នះមេដាយប្រាក់ជើងឯកទ្វីបអាស៊ី ២សម័យកាលពីឆ្នាំ២០១១ និងឆ្នាំ២០១៥ ទៀតផង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
