ភ្នំពេញ: ការប្រឡងជ្រើសរើសគ្រូបង្រៀនកម្រិតអនុវិទ្យាល័យ លើវិញ្ញាសាសរសេរលើកទី ២ បានចាប់ផ្ដើមនៅថ្ងៃទី ១៨ ខែឧសភា ឆ្នាំ ២០២៤ នៅសាកលវិទ្យាល័យភូមិន្ទភ្នំពេញ។ ការប្រឡងលើកចុងក្រោយនេះ ធ្វើឡើងរយៈពេលមួយថ្ងៃប៉ុណ្ណោះ ដោយមានបេក្ខជនចូលរួមប្រឡងសរុប ១ ៣៧៩ អង្គនាក់។

ការប្រឡងធ្វើជាគ្រូបង្រៀនអនុវិទ្យាល័យ លើវិញ្ញាសាសរសេរលើកទី ២ បានចាប់ផ្ដើមដំណើរការនៅម៉ោង ១២. ៣០នាទីថ្ងៃត្រង់ ថ្ងៃទី ១៨ ខែឧសភា ឆ្នាំ ២០២៤នេះ។ ការប្រឡងវគ្គចុងក្រោយនេះ គឺមានបេក្ខជនចូលរួមប្រឡងចំនួន ១ ៣៧៩អង្គនាក់។ ពួកគេជាបេក្ខជន ដែលបានប្រឡងជាប់ក្នុងការប្រឡងសម្រាំងលើកទី ១ កាលពីដើមខែ ឧសភា ដែលមានបេក្ខជនចូលរួមប្រឡងរហូតដល់ជាង ៣ម៉ឺននាក់។

ការប្រឡងនៅថ្ងៃនេះ ជាការប្រឡងចុងក្រោយដែលនឹងសម្រេចយកអ្នកជាប់ចំនួន ៤៤១នាក់ ឱ្យក្លាយជាគ្រូបង្រៀនអនុវិទ្យាល័យ បម្រើការនៅក្រសួងអប់រំ យុវជន និងកីឡា។

ក្នុងឱកាសប្រឡងលើកចុងក្រោយនេះ ក៏មានការចូលរួមត្រួតពិនិត្យ និងកាត់វិញ្ញាសាដោយផ្ទាល់ ពីសំណាក់ ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ មន្ត្រីក្រសួងអប់រំ យុវជន និងកីឡា រួមទាំងអ្នកសង្កេតការណ៍មកពីបណ្ដាស្ថាប័ន និងមន្ត្រីនៃអង្គភាពប្រឆាំងអំពើពុករលួយផងដែរ។

ការប្រឡងដែលប្រព្រឹត្តិទៅនៅថ្ងៃនេះ គឺបេក្ខជនគ្រប់រូបត្រូវប្រឡងលើពីរវិញ្ញាសា ដោយវិញ្ញាសានីមួយៗមានរយៈពេលពីរម៉ោង។ វិញ្ញាសាទី ១ គឺសំដៅលើមុខវិជ្ជាឯកទេសគោលទី ១ រីឯ វិញ្ញាសាទី ២ គឺបេក្ខជនត្រូវប្រឡងលើមុខវិជ្ជាឯកទេសទី ២ ដែលស្របតាមឧបសម្ព័ន្ធកំណត់ដោយក្រសួងអប់រំ យុវជន និងកីឡា។

សម្រាប់ការប្រឡងនៅថ្ងៃនេះដែរ វត្តមានអាណាព្យាបាលជាច្រើនបានធ្វើដំណើរមកពីបណ្ដាខេត្ត ដើម្បីលើកទឹកចិត្តកូនប្រឡងដោយផ្ទាល់ផងដែរ។ ពួកគាត់មើលឃើញពីភាពសុក្រឹត្យនៃការរៀបចំការប្រឡង ដែលផ្ដល់ជាទំនុកចិត្តសម្រាប់ពួកគាត់។ ពួកគាត់ជូនពរកូនឱ្យជោគជ័យសម្រាប់ការប្រឡើងលើកចុងក្រោយនេះ ស្របតាមកិច្ចប្រឹងប្រែង និងសមត្ថភាពពិត ដើម្បីក្លាយជាគ្រូបង្រៀន។

ការប្រឡងធ្វើជាគ្រូបង្រៀនអនុវិទ្យាល័យលើវិញ្ញាសាសរសេរលើកទីពីរនេះ ក៏មានការរៀបចំសម្រួលដល់បេក្ខជន និងអាណាព្យាបាលបេក្ខជនកាន់តែប្រសើរផងដែរ។ ជាក់ស្ដែងក្រុមការងារ នៃគណៈកម្មការរៀបចំការប្រឡង នៃក្រសួងមុខងារសាធារណៈ មានការរៀបចំជាស្តង់សម្រាប់អាណាព្យាបាលអាចរង់ចាំបេក្ខជន សាងសង់ជារោងសម្រាប់កាត់បន្ថយកម្ដៅពេលបេក្ខជនតម្រង់ជួរ ការផ្តល់ទឹកដោយមិនគិតថ្លៃសម្រាប់បេក្ខជន ក៏ដូចជាស្តង់ព័ត៌មានសម្រាប់ផ្ដល់ជាព័ត៌មាននានាជូនបេក្ខជនផងដែរ។ អត្ថបទ៖ គឹមហុក