លោក ហ្វីលីប ឡាហ្សារីនី (Philippe Lazzarini) អគ្គស្នងការនៃទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ដើមបូព៌ា (UNRWA) កាលពីថ្ងៃសៅរ៍ (១៨ ឧសភា) បានបង្ហោះនៅលើគណនីប្រព័ន្ធផ្សព្វផ្សាយសង្គមរបស់ខ្លួន ដោយនិយាយថា មនុស្សជាង ៨០០.០០០ នាក់ ឬជិតពាក់កណ្តាលនៃចំនួនប្រជាជននៃទីក្រុង រ៉ាហ្វា (Rafah) ត្រូវបានបង្ខំឱ្យភៀសខ្លួនចេញពីតំបន់នេះ ចាប់តាំងពីកងកម្លាំងអ៊ីស្រាអែល បានចាប់ផ្តើមប្រតិបត្តិការយោធានៅទីនោះកាលពីថ្ងៃទី០៦ ខែឧសភា មក។

ប្រធានទីភ្នាក់ងារជំនួយ UNRWA រូបនេះបាននិយាយថា ដើម្បីឆ្លើយតបទៅនឹងបទបញ្ជាជម្លៀសដែលទាមទារឱ្យប្រជាជនភៀសខ្លួនទៅកាន់តំបន់សុវត្ថិភាព ពលរដ្ឋហ្កាហ្សា បានរត់ភៀសខ្លួនទៅកាន់តំបន់ដែលពុំមានទឹកស្អាត និងកន្លែងអនាម័យ។ លោក ឡាហ្សារីនី ក៏បានបន្ថែមផងដែរថា តំបន់ហ្កាហ្សា មិនមានតំបន់សុវត្ថិភាពទេសម្រាប់មនុស្សជ្រកកោននោះទេ។

ទីភ្នាក់ងារ UNRWA បាននិយាយនៅក្នុងសេចក្តីថ្លែងការណ៍មួយថា ក្រុមគ្រួសារប៉ាឡេស្ទីនជាច្រើននៅហ្កាហ្សា ត្រូវបានបង្ខំឱ្យភៀសខ្លួនជាច្រើនដង ដោយខ្លះត្រូវបានផ្លាស់ទីលំនៅជារៀងរាល់ខែ ហើយការអះអាងពី «តំបន់សុវត្ថិភាព» របស់កងទ័ពអ៊ីស្រាអែល គឺជារឿងមិនពិត និងបំភាន់តែប៉ុណ្ណោះ។

អ៊ីស្រាអែល បានប្ដេជ្ញាលុបបំបាត់ក្រុមហាម៉ាស ហើយបានអះអាងម្ដងហើយម្ដងទៀតថា កងកម្លាំងប្រយុទ្ធចំនួន ៤ កងរបស់ក្រុមនេះកំពុងលាក់ខ្លួននៅក្រុងរ៉ាហ្វា ជាទីដែលមនុស្សរាប់សែននាក់កំពុងជ្រកកោន៕