នគរបាលអ៊ីស្រាអែល បានប្រើកាណុងបាញ់ទឹកក្នុងការប៉ះទង្គិចជាមួយបាតុករប្រឆាំងរដ្ឋាភិបាល ក៏ដូចជាក្រុមអ្នកតវ៉ាទាមទារឱ្យមានការដោះលែងចំណាប់ថ្នូរ ដែលកំពុងបិទផ្លូវហាយវេក្នុងទីក្រុង តែលអាវីវ (Tel Aviv) កាលពីថ្ងៃសៅរ៍ (១៨ ឧសភា)។

ក្រុមអ្នកតវ៉ាបាននឹងកំពុងអំពាវនាវឱ្យលោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) ចុះចេញពីដំណែង និងទាមទារមានការបោះឆ្នោតថ្មី រួមទាំងបទឈប់បាញ់ជាបន្ទាន់ ដើម្បីដោះលែងចំណាប់ថ្នូរ ដែលឃុំខ្លួននៅតំបន់ហ្កាហ្សា ចាប់តាំងពីថ្ងៃទី០៧ ខែតុលា។

ក្រុមបាតុកររាប់ពាន់នាក់ បានកាន់រូបភាពចំណាប់ថ្នូរ ស្រែកពាក្យតវ៉ា និងបានអំពាវនាវឱ្យមានបទឈប់បាញ់ជាបន្ទាន់ និងដោះលែងអ្នកដែលត្រូវបានចាប់ខ្លួន។ នាយករដ្ឋមន្ត្រីអ៊ីស្រាអែល លោក ណេតាន់យ៉ាហ៊ូ បានប្រឈមមុខនឹងការរិះគន់ទាំងក្នុងប្រទេស និងក្រៅប្រទេស ចំពោះការខកខានមិនបានបង្ហាញសញ្ញាពីការបញ្ចប់សង្រ្គាមអស់រយៈពេលជាងប្រាំពីរខែ។

នៅក្នុងការវាយប្រហាររបស់ក្រុមហាម៉ាស កាលពីថ្ងៃទី០៧ តុលា មនុស្សប្រហែល ១.២០០ នាក់បានស្លាប់នៅក្នុងប្រទេសអ៊ីស្រាអែល និងមនុស្ស ២៥៣ នាក់ត្រូវបានចាប់ធ្វើជាចំណាប់ថ្នូរ ហើយមនុស្សប្រហែល ១២៥ នាក់នៅតែត្រូវបានឃុំខ្លួននៅហ្កាហ្សា បន្ទាប់ពីបទឈប់បាញ់រយៈពេលមួយសប្ដាហ៍ ដែលនាំឱ្យមានមនុស្សមួយចំនួនត្រូវបានដោះលែង៕