​បាល់ទាត់៖ ក្រុមបាល់ទាត់​ជម្រើស​ជាតិ​កម្ពុជា​នឹង​ត្រូវ​លេង​វគ្គ​ជម្រុះ Play-Off នៃ​ពានរង្វាន់​ជើង​ឯក​ទ្វីប​អាស៊ី​ឆ្នាំ​២០២៣ នៅ​ប្រទេស​ចិន ជាមួយ​ក្រុម​កោះ​ហ្គាំ​លើ​ទឹកដី​កណ្ដាល​ទាំង ២​ជើង​នៅ​ប្រទេស​បា​រ៉ែ​ន ក្រោយ​ការសម្រេច​របស់​គណៈកម្មកា​រ​ប្រកួត​សហព័ន្ធ​កីឡាបាល់ទាត់​ទ្វីប​អាស៊ី ​(AFC) បន្ទាប់ពី​មាន​ការរីក​រាលដាល​ខ្លាំងនៃ​ជំងឺ​កូ​វីដ​-១៩ នៅ​ប្រទេស​ទាំងពីរ។ នេះ​បើតាម​ការប្រកាស​របស់​សហព័ន្ធ​កីឡាបាល់ទាត់​កម្ពុជា​(FFC) នៅ​ថ្ងៃទី​០៥ ខែសីហា ឆ្នាំ​២០២១។​

​យោងតាម​ការជូនដំណឹង​របស់​សហព័ន្ធ​កីឡាបាល់ទាត់​កម្ពុជាបាន​បញ្ជាក់ថា ដោយសារ​ស្ថានភាព​ជំងឺ​កូ​វីដ​-១៩ នៅ​កម្ពុជា និង​កោះ​ហ្គាំមានការ​រីក​រា​ដាល​ខ្លាំង​ធ្វើ​ឲ្យ​ការធ្វើដំណើរ​ទៅមក និង​ចេញចូល​មានការ​លំបាក ដូច្នេះ​គណៈកម្មការ​ប្រកួត​សហព័ន្ធ​កីឡាបាល់ទាត់​អាស៊ី បានសម្រេច​រៀបចំ​ការ​ប្រកួតរវាង​ក្រុម​ជម្រើសជាតិ​កម្ពុជា និង​កោះ​ហ្គាំនៅ​ប្រទេស​បា​រ៉ែ​នសម្រាប់​ការប្រកួត​វគ្គ​ជម្រុះ AFC Asian Cup 2023 Play-Off ដើម្បី​ឡើងទៅ​កាន់​វគ្គ​ជម្រុះ​ជុំ​ទី៣។​

​ចំពោះ​កម្មវិធី​ប្រកួត Play-Off រវាង​ក្រុម​ទាំងពីរនឹងធ្វើ​ឡើង​ទាំង ២​ជើងនៅ​កីឡដ្ឋាន Khalifa Sport City នា​ប្រទេស​បា​រ៉ែ​នដោយ​ជើង​ទី​១ ត្រូវ​ប្រកួត​នា​ថ្ងៃទី​០៩ ខែតុលា ខណៈ​ជើង​ទី​២ ប្រកួត​នៅ​ថ្ងៃទី​១២ ខែតុលា ឆ្នាំ​២០២១ ខាងមុខ ហើយ​ក្រុម​ទទួលបាន​ជ័យជម្នះនឹង​ឡើងទៅ​វគ្គ​ចែក​ពូ​លនៃ​វគ្គ​ជម្រុះ​ជុំ​ទី​៣ ដែល​កំពុងមាន​បេក្ខភាព ២២​ក្រុម​កំពុង​ឈរ​ចាំ។ រីឯ​បេក្ខភាព​ប្រកួត​វគ្គ Play-Off ដើម្បី​ប្រជែង​កៅអី​វគ្គ​ចែក​ពូ​ល​ជុំ​ទី​៣ មួយ​ប្រកួត​ទៀតគឺជា​ការជួបគ្នា​រវាង​ក្រុម​ជម្រើសជាតិ​ឥណ្ឌូនេស៊ី និង​ក្រុម​ឆាយ​នី​ស​តៃប៉ិ៕

​អត្ថបទ៖ លី ឈុន​ឡា