ប្រជាជន បានមកប្រមូលផ្តុំគ្នាដើម្បីបួងសួង ក្នុងរដ្ឋធានីតេអេរ៉ង់ ប្រទេសអ៊ីរ៉ង់ កាលពីថ្ងៃអាទិត្យ បន្ទាប់ពីឧបទ្ទវហេតុធ្លាក់ឧទ្ធម្ភាគចក្រ ដឹកប្រធានាធិបតី លោក អ៊ីប្រាហ៊ីម រ៉ៃស៊ី(Ebrahim Raisi) នៅភាគពាយព្យប្រទេស។

មន្ត្រីម្នាក់ បានប្រាប់សារព័ត៌មានរ៉យទ័រថា ជីវិតរបស់លោក Raisi និងរដ្ឋមន្ត្រីការបរទេស លោក ហូសេន អាមីរ៉ាបដូឡាហៀន(Hossein Amirabdollahian) ស្ថិតក្នុងហានិភ័យបន្ទាប់ពីការធ្លាក់ឧទ្ធម្ភាគចក្រ ដែលបានកើតឡើងនៅតាមផ្លូវត្រឡប់មកពីដំណើរទស្សនកិច្ចទៅកាន់ព្រំដែនជាមួយប្រទេសអាសៃបៃហ្សង់ នៅភាគពាយព្យប្រទេសអ៊ីរ៉ង់។

មនុស្សជាច្រើន បានតាមដានព័ត៌មាននៃការធ្លាក់ឧទ្ធម្ភាគចក្រតាមទូរស័ព្ទរបស់ពួកគេ ខណៈពួកគេបួងសួង។ បុរសម្នាក់ និយាយថា លោកកំពុងបួងសួងសុំសេចក្តីសុខសម្រាប់លោក Raisi ។ អ្នកបួងសួងម្នាក់ទៀតនិយាយថា អ៊ីរ៉ង់នឹងនៅតែរឹងមាំ មិនថាមានអ្វីកើតឡើងនោះទេ។

ប្រព័ន្ធផ្សព្វផ្សាយរដ្ឋរបស់អ៊ីរ៉ង់ បានរាយការណ៍ថា អាកាសធាតុមិនអំណោយផល គឺជាមូលហេតុនៃការធ្លាក់ឧទ្ធម្ភាគចក្រ ហើយអាកាសធាតុបែបនេះកំពុងធ្វើឱ្យមានភាពស្មុគស្មាញដល់កិច្ចខិតខំប្រឹងប្រែងជួយសង្គ្រោះ។ ទីភ្នាក់ងារព័ត៌មានរដ្ឋ IRNA បាននិយាយថា លោក Raisi បានជិះនៅលើឧទ្ធម្ភាគចក្រ Bell 212 ផលិតដោយសហរដ្ឋអាមេរិក។

ក្រុមអ្នកជួយសង្គ្រោះ ត្រូវបានគេរំពឹងថា បានទៅដល់កន្លែងកើតហេតុ នៃការធ្លាក់យន្តហោះ កាលពីល្ងាចថ្ងៃអាទិត្យ។