គណៈអចិន្ត្រៃយ៍គណៈកម្មាធិការគណបក្សប្រជាជនកម្ពុជា រាជធានីភ្នំពេញ រួមទាំង​ប្រជាពលរដ្ឋ​ជា​អ្នករស់រានមានជីវិតពីរបបប្រល័យពូជសាសន៍ខ្មែរក្រហម និងយុវជនក្នុងសង្គមបច្ចុប្បន្ន បាន​ជួប​ជុំប្រារព្ធទិវាជាតិនៃការចងចាំ នៅមជ្ឈមណ្ឌលឧក្រិដ្ឋកម្មប្រល័យពូជសាសន៍ជើងឯក នៅថ្ងៃទី ២០ ខែឧសភា ឆ្នាំ ២០២៤នេះ។

ជារៀងរាល់ឆ្នាំ ទិវាជាតិនៃការចងចាំតែងប្រារព្ធឡើង ពិសេស​នៅ​ទីតាំង​ប្រវត្តិសាស្ត្រ​ដែល​បន្សល់​ទុក​ដោយ​របបប្រល័យពូជសាន៍ខ្មែរក្រហម។ ជាក់ស្ដែងទិវាជាតិនៃការចងចាំ នៅឆ្នាំ ២០២៤នេះ គណៈ​អចិន្ត្រៃយ៍គណៈកម្មាធិការគណបក្សប្រជាជនកម្ពុជារាជធានីភ្នំពេញ ក្រោមវត្តមាន ឯកឧត្តម ម៉ប់ សារិន ប្រធានគណៈប្រចាំ​ការ​គណៈ​អចិន្ត្រៃយ៍​គណៈកម្មាធិការ​គណបក្ស​រាជធានី​ភ្នំពេញ និងមាន​ការ​ចូលរួមពីប្រជាពលរដ្ឋជាអ្នករស់រាន​មាន​ជីវិត​ពីរបបប្រល័យពូជសាស​ន៍​ខ្មែរ​ក្រហម និងយុវជនក្នុងសង្គមបច្ចុប្បន្ន។

ការ​ប្រារព្ធទិវាជាតិនៃការចងចាំនៅថ្ងៃនេះ ក៏មានការរៀបចំពិធីតាមបែបសាសនាដើម្បីបង្សុកូល រាប់​បាត្រ ព្រះសង្ឃចំនួន ១០៨ អង្គ ឧទ្ទិសជូនវិញ្ញាណក្ខន្ធបុព្វបុរស និងប្រជាជន ដែល​បាន​ស្លាប់​បាត់​បង់ជីវិតក្នុង របបប្រល័យពូជសាសន៍។ លើសពីនេះ គឺមានការសម្ដែងឈុតឆាក នូវសោក​នាដ​កម្ម​ដែលបានកើតឡើងក្នុងរបបប្រល័យពូជសាសន៍ខ្មែរក្រហមផងដែរ។

ក្នុង​ការចូលរួមនៅថ្ងៃនេះដែរ សម្រាប់អ្នករស់រានមានជីវិតពីរបបប្រល័យពូជសាសន៍ បាន​លើក​ឡើង​ថារបប ៣ឆ្នាំ ៨ខែ និង ២០ថ្ងៃ ជាការចងចាំ​ដែល​មិន​អាច​បំភ្លេច​បា​នទោះ​កន្លង​ទៅ​ច្រើន​ឆ្នាំ​យ៉ាង​ណាក្ដី។ ពួកគាត់នៅតែចងចាំភាពវេទនា ភាពភ័យខ្លាច ភាពអត់ឃ្លាន ទារុណកម្ម និងការ​បាត់បង់​សមាជិកគ្រួសារ ដែលបានកើតឡើងក្នុងរបបនោះ។ ភ្ជាប់ជាមួយការចងចាំនេះដែរ ពួក​គាត់​សូម​ដឹងគុណជានិច្ចដល់សម្ដេច តេជោ ហ៊ុន សែន និងការពលីរបស់កងកម្លាំង ដែលបាន​រំដោះ​កម្ពុជា ចេញពីរបបខ្មៅងងឹត និងនាំមកជីវិតថ្មី សុខសន្តិភាព ការអភិវឌ្ឍមកទល់​បច្ចុប្បន្ន។

ក្នុងឱកាសនោះ ក្រៅពីវត្តមានមនុស្សវ័យចាស់ជាអ្នករស់រានមានជីវិតពីរបបប្រល័យពូជសាសន៍ គឺ​មានវត្តមានយុវជនចូលរួមក្នុងទិវាជាតិនៃការចងចាំនេះផងដែរ។ ពួកគេជាយុវជន លើក​ឡើង​ដែរ​ថា ទោះពួកគេកើតពុំទាន់របបខ្មៅងងឹតនោះក្ដី តែពួកគេជាអ្នក​ទទួល​ផល​រស់​នៅ​ក្នុង​សង្គ​ម​សុខ​សន្តិភាព ដែលកម្ពុជាបានមកដោយលំបាក។ ពួកគេបានប្ដេជ្ញាថែរក្សា សុខសន្តិភាព ការ​អភិវឌ្ឍ និងសង្គមជាតិមួយនេះឱ្យបានគង់វង្សជាដាច់ខាត ក្នុងនាមជាយុវជន ជាអ្នកបន្តវេន។

សូមជម្រាបថា ថ្ងៃ ២០ ឧសភានេះជាថ្ងៃទិវាជាតិ នៃការចងចាំដែ​ល​ជាថ្ងៃ​ប្រជាជន​កម្ពុ​ជា​គ្រប់​ៗរូ​បចង​ចាំមិ​នអាចបំភ្លេចបាន ក្នុងរបបកម្ពុជាប្រជាធិបតេយ្យ ឬហៅថារបបប្រល័យពូជសាសន៍ ប៉ុល ពត (១៧ មេសា ១៩៧៥ - ៦ មករា ១៩៧៩) ដែលជារបបដ៏ឃោរឃៅ និងខ្មៅងងឹត។ ទិវានេះជាការរំលឹកដល់វិញ្ញាណក្ខន្ធដល់ជនរងគ្រោះជាង៣លាននាក់ ដែលបាន​ស្លាប់​បាត់​បង់​ជីវិត នៅក្នុងរបបប្រល័យពូជសាសន៍ ប៉ុល ពត៕ អត្ថបទ៖ គឹម ហុក